„Шоуто на Ник Кејв во Скопје нема никаква економска логика“, вели Бобан Милошески пред утрешниот концерт на легендарниот австралиски музичар на стадионот на АРМ во Градскиот парк.
Сопственикот на „Авалон“, промоторската куќа што го организира овој настан, е дециден дека доаѓањата на уметници од калибарот на Ник Кејв или Боб Дилан во Македонија не се бизнис-потег, туку свесно преземен ризик со повисока културна цел.
„Ние ќе заработиме пари на друго место за да го дополниме овој минус. Се работи за стил на живот и за желба оваа држава барем во нешто да не биде провинција. Сакам во времето додека сум работел тука да остане трага дека сме донеле значајни современици што го обликувале животот на повеќе генерации и дека сме направиле нешто навистина вредно. Затоа доаѓањето на Ник Кејв во Скопје за нас е национален празник“, вели Милошески.
Во разговор за „Блумберг Адрија“ тој открива дека добри десет години траеле преговорите за да го донесат кај нас. Претходно, во два наврата биле блиску до финално потврдување, но работите пропаѓале во последен момент.
„Овој пат така се наредија коцките, се погоди оваа година да свири со Колин Гринвуд, таква му е програмата, а мене ми се допаѓа оваа негова варијанта, особено ако се земе предвид оној човечки момент во кој тој се наоѓа изминативе години, па неговите тешки песни во ваква соголена форма само со клавир и бас дејствуваат уште попотресно отколку што де факто се“, вели Милошески.
Depositphotos
* Двајца од четворицата синови на Ник Кејв прерано го загубија животот. Артур Кејв (15) почина во 2015 година откако падна од карпа во близината на Брајтон. Во 2022 година ненадејно почина и неговиот најстар син Џетро (31). Во кратката изјава музичарот тогаш напиша: „Со голема тага можам да потврдам дека мојот син Џетро почина. Би биле благодарни за семејна приватност во овој момент.“
Концертот ќе трае околу два и пол часа и публиката ќе има можност во живо да ги слушне сите најзначајни песни од неговиот каталог. За утрешната долгоочекувана средба со македонската публика нема ВИП-влезници, ниту пак специјални пакети со коњопои. Како што истакнува Милошески, намерата е овој концерт да остане исклучиво музички настан, ослободен од елитизам и кафеанска атмосфера. Куриозитет е и тоа што првпат во тридецениското работење на „Авалон“ за еден нивен концерт се продадени повеќе влезници за фанпит (3.990 денари), отколку за партер (2.990 денари), факт што, според нашиот соговорник, доволно говори за квалитетот на публиката.
Според податоците од продадените билети со кои тој располага, на концертот се очекува да присуствуваат и меѓу 500 и 700 луѓе од странство, не само од соседните земји туку и од Франција, Англија, Норвешка, Холандија и други делови на Западна Европа. Според Милошески, овој податок покажува дека во Скопје не доаѓаат случајни посетители, туку вистински фанови на Ник Кејв, кои го следат низ цела Европа. Како дополнителен мотив ја наведува и цената на влезниците, која е драстично пониска споредено со кој било друг концерт од оваа турнеја.
„За концертите на Ник Кејв во Пловдив, на пример, влезниците беа од 140 до 280 евра, а кај нас се 50 и 70 евра. Тоа е чиста перверзија од наша страна“, коментира Милошески.
Depositphotos
Без ВИП-влезници, но и без ВИП-третман
Ник Кејв е еден од највлијателните и најпродуктивни творци во современата популарна музика, но и релативно скап играч во музичката индустрија. Според повеќе извори, негов настап на приватен настан чини и до половина милион долари. Хонорарот за скопскиот концерт останува деловна тајна, но ако се земат предвид овие податоци, дисбалансот меѓу реалните трошоци и ниските цени на влезниците доаѓа уште повеќе до израз.
Освен што многу чинат, светските музички ѕвезди често испорачуваат и долги и необични рајдер-листи, но менаџментот на Ник Кејв не испратил никакви префинети барања за неговиот настап во Скопје. Освен да му се обезбедат возач и автомобил, култниот музичар немал други специјални услови, оставајќи впечаток на човек што повеќе сака да шета, да истражува и да се изгуби низ улиците на градот, отколку да бара ВИП-третман. Она, пак, за што не прави компромиси е продукцијата.
„Секое парче опрема мораше да биде однапред одобрено, без простор за импровизации или замени. Иако шоуто е камерно, менаџментот бара апсолутна прецизност и врвна техничка подготвеност. На пример, таков клавир каков што бараше Ник Кејв нема во Македонија, нема ниту во Србија. Во Бугарија има неколку, кои, за жал, не се достапни за транспорт. Затоа бевме принудени да донесеме пијано од Грција. Истото тоа важи и за монитори и миксети. Не станува збор дали нешто е ново или подобро, туку дали одговара на неговите стандарди. Едноставно, ова ниво на продукција не трпи импровизации“, вели Милошески.
.webp){kind=icon}
Во моментов нема коментари за веста. Биди прв да коментира...