.webp){kind=icon}
Возбудлива авантура под отворено небо од неодамна им се нуди на домашните и странските туристи во Македонија. Сега тие можат да уживаат во недопрената природа на нашата земја на полуксузен начин, доколку се подготвени ноќта да ја поминат во висечки шатор прикачен на карпа на височина од 200 метри и за тоа задоволство да платат 600 евра.
„Ноќ во висечки шатор“ (Night on a portaledge) е уникатна програма што се нуди на веб-страницата rockclimbing.mk, а креатор на концептот е Дарио, професионален алпинист со триесетгодишно искуство. Тој вели дека безбедноста е на максимално ниво и дека аранжманот е погоден дури и за оние што немаат планинарско искуство.
„Ние ќе ве подготвиме за сè, ќе ве водиме низ секој чекор. Ваша задача е да уживате во совршените погледи, да го почувствувате адреналинот и да си поминете најубаво“, пишува во официјалната понуда на сајтот, каде што се нудат уште осум други програми за искачување на карпи.
Особено е атрактивно местото за ова несекојдневно адреналинско доживување. Демиркаписката Клисура не само што е една од најквалитетните локации за искачување во нашата земја туку е и еден од најбогатите орнитолошки резервати во Европа според застапеноста на ретки грабливи птици.
Турата со подготовки трае од 12 до 16 часа. По детална проверка на теренот, Дарио и неговиот тим ќе ви ги соопштат потребните инструкции и ќе ве запознаат со основната опрема за овој подвиг - појаси за качување, шлем, соодветни обувки. Потоа, со лицата одговорни за вашето ноќевање ќе се упатите кон карпата на која ќе ја поминете ноќта. За искачувањето, кое го предводат инструктори, се одбира релативно лесна маршрута со фиксни јажиња. Откако ќе се поставите на висечкиот шатор и ќе ви се обезбеди потребната удобност, ќе добиете инструкции за начинот на кој треба да контактирате со тимот доколку почувствувате каква било непријатност и посакате веднаш да ве симнат на земја.
Во цената се вклучени оброк и безалкохолен пијалак. Тимот ќе ви обезбеди и вреќи за спиење со мали перници. Висечките шатори се приспособени за двајца, па имајте на ум дека тандем-опцијата е многу поисплатлива затоа што вкупно ќе платите 800 евра. Сепак, доколку немате друштво, а не се чувствувате подготвено оваа авантура да ја доживеете сами, постои можност во текот на ноќта да ве придружува некој од водичите.
Постои уште една опција, да преспиете во внатрешноста на клисурата на височина од 90 метри, од каде што имате убав поглед кон повеќето патеки за искачување. Локацијата е под сенка, па оваа програма е особено препорачлива за летниот период, иако е достапна во сите годишни времиња.
Пристапот е една минута пешачење од автомобилот, па следува лесно искачување со претходно фиксирани јажиња, исто така со асистенција од професионалните водичи.
И за оваа тура, со подготовки, се предвидени од 12 до 16 часа, но е поевтина и чини 400 евра за сингл-доживување и 600 евра за двајца.
