.webp){kind=icon}
Барселона планира да воведе забрана низ градот за краткорочно изнајмување недвижности за да одговори на поплаките дека туризмот е одговорен за локалната станбена криза и зголемувањето на цените за изнајмување.
Медитеранскиот град ќе престане да издава нови лиценци и нема да ги обновува постојните, така што од 2029 година нема да биде дозволено да се издава ниту една станбена единица како туристичко сместување, изјави во петокот на прес-конференција градоначалникот на Барселона, Жауме Колбони. Во моментов околу 10.000 куќи се регистрирани како туристичко сместување.
„Потребни се повеќе станови, а мерките што ги воведуваме денес имаат цел да обезбедат станови за работничката средна класа да може да остане во градот и да не мора да го напушта бидејќи не може да си дозволи да живее тука“, рече Колбони. „Оваа мерка нема да ја промени ситуацијата прекуноќ. За овие проблеми е потребно време. Но со оваа мерка означуваме пресврт“.
Жауме Колбони
Bloomberg Mercury
Додека многу градови низ светот се соочуваат со слични притисоци, потегот на Барселона може да го означи најагресивниот став досега против становите за краткорочно изнајмување, кои често се наоѓаат на онлајн платформите како „Ербиенби“ (Airbnb). Градовите како Њујорк, Ванкувер и Токио сега инсистираат на тоа дека домаќините мора да живеат во становите што ги изнајмуваат, додека Сан Франциско и Сиетл го ограничуваат бројот на имоти што може да ги понуди домаќинот.
Далас забрани краткорочно изнајмување во одредени населби, додека многу други - вклучувајќи ги Лондон, Амстердам и Париз - поставија ограничувања на бројот на ноќевања на кои може да се изнајми еден стан во текот на годината.
Досега најдалеку со рестрикциите отиде Берлин, кога во 2016 година воведе забрана за краткорочно издавање цели куќи. Меѓутоа, откако забраната се покажа тешка за спроведување, градот го укина законот во 2018 година и го замени со полесни ограничувања и повисоки казни за нивно прекршување.
Барселона веќе забрани издавање соби за туристи, изјави портпаролот на градското одделение за урбанизам. Цените за изнајмување продолжија да растат.
Колбони во петокот рече дека Барселона моментално има „небесно високи цени за изнајмување, кои секој ден стануваат поголеми“. Изнајмувањето по квадратен метар во Барселона се зголеми за 14 отсто во 12-те месеци до април, што е највисоко меѓу шпанските градови, според „Идеалиста“ (Idealista), најголемиот сајт за рекламирање недвижности во земјата.
Градот во 2023 година го посетиле 16 милиони туристи, покажуваат податоците на туристичката опсерваторија на Барселона. Oд „Ербиенби“ не одговорија веднаш на барањето за коментар.
