Кинеските власти предупредија дека навивачите не треба да организираат роденденски прослави за спортисти од националните тимови, наведувајќи загриженост поради користење јавни ресурси и нарушување на тренинзите, објави Кинеската централна телевизија.
Претставник на Генералната администрација за спорт изјави дека властите забележале дека спортски ентузијасти организираат вакви собири, вклучително и поставување екрани во трговски центри на кои се прикажуваат фотографии од спортисти, објави Си-си ТВ. Ваквите настани ризикуваат да ги нарушат подготовките на спортистите за натпревари, ја цитираше телевизијата изјавата на претставникот, без да понуди дополнителни детали.
Властите спроведуваат мерки против таканаречените „фан кругови“ — организирани групи што координираат интернет кампањи и комерцијални активности насочени кон спортисти и други познати личности. Во обид да воспостави поголема контрола врз интернет културата, Пекинг прецизираше ограничувања за тоа како ваквите групи можат да се организираат, мобилизираат и да заработуваат од јавното внимание.
Иако фан културата постои насекаде, во земји како САД таа главно е обликувана од пазарните сили и регулирана од приватни платформи и граѓанско право. Кина, за разлика од тоа, ги третира овие групи како прашање на управување поврзано со општествениот ред.
Претставникот во извештајот на Си-си ТВ исто така, предупреди дека организаторите и трговските центри можеби користат фотографии од спортисти без дозвола, со што потенцијално ги нарушуваат нивните законски права. Во извештајот се додава дека навивачите треба да се фокусираат на настапите на спортистите на натпреварите и да даваат поддршка на рационален начин, водејќи сметка да ги почитуваат релевантните закони и прописи.
Властите побараа од јавноста да не организира и да не учествува во роденденски прослави за спортисти, наведувајќи дека таквиот чекор е неопходен за одржување уредена средина за тренинзи и натпревари, според Си-си ТВ.
.webp){kind=icon}
