Бумерите во САД не се возбудени за Мундијалот, не знаат ни кој е Меси

Светското првенство често се нарекува најголемиот настан на планетата. Но тоа не е случај во САД, и покрај тоа што Америка за првпат по три децении е домаќин на натпреварите.

Во една неодамнешна анкета повеќе од половина од возрасните во САД рекле дека е малку веројатно дека ќе гледаат некој од 104. натпревари на турнирот на телевизија дома. Само 13 отсто рекле дека се апсолутно сигурни дека ќе гледаат, според анкетата на „Морнинг консалт“ (Morning Consult), спроведена кон крајот на мај за „Блумберг“.

Ставовите за турнирот значително се разликуваат по возраст. Генерацијата зед, чии најстари членови се во доцните 20-ти години, покажала најголем ентузијазам. Во меѓувреме, бебибумерите, сега во 60-тите и 70-тите години, покажале најмал интерес, бидејќи три четвртини од оваа група изјавиле дека не се обожаватели на фудбал и околу половина никогаш не слушнале за аргентинската ѕвезда Лионел Меси.

Bloomberg Mercury

Еден проблем се чини дека е тоа што многу Американци не слушнале многу за Светското првенство, кое заеднички го организираат САД, Мексико и Канада и започнува денеска. Само една четвртина од испитаниците рекле дека дознале многу или повеќе за турнирот, додека речиси 40 отсто рекле дека ништо не им привлекло внимание.

Голем дел од она што Американците го слушнале за Светското првенство биле негативни информации, според анкетата на околу 2.000 луѓе. На врвот на листата е тоа дека 30 отсто рекле оти се свесни за високите цени на билетите. Реакцијата против тие трошоци и начинот на распределба на билетите вклучува државни истраги и речиси 70 члена на американскиот Конгрес кои повикаа цените да се намалат.

ФИФА, организаторот на турнирот, кој му додели „мировна награда“ на американскиот претседател Доналд Трамп, се наведува како втор најчест негативен фактор. Тој потег е силно негативен кај 31 отсто од испитаниците, наспроти 16 отсто што силно го поддржале.

Bloomberg Mercury

Големи брендови, од „Мекдоналдс“ (McDonald’s) до „Верајзон“ (Verizon), вложија милиони во рекламирање, и како официјални партнери на ФИФА и за време на натпреварите што во САД ќе ги емитуваат „Фокс“ (Fox) и „Телемундо“ (Telemundo) на Комксат (Comcast). Според анкетата, испитаниците најчесто ја поврзувале „Кока-Кола“ со маркетингот на Светското првенство. Брендот за газирани пијалаци почна да се рекламира на турнирот уште во 1950 година и повторно е официјален спонзор.

„Најк“ се најде на второто место по препознатливост на брендот. Производителот на спортска опрема не е официјален партнер на ФИФА, но има договори со неколку истакнати национални тима, како Франција, Англија и САД. „Адидас“ заостанува неколку процентни поени зад својот ривал, и покрај тоа што е долгогодишен партнер на Светското првенство, како и креатор на официјалната топка за овој турнир.

Bloomberg Mercury

Пред почетокот на турнирот има знаци дека побарувачката не е на очекуваното ниво. Аргентинска авиокомпанија ги намалила летовите специјално наменети за патници на Светското првенство, а домаќини на „Ербиенби“ (Airbnb) во еден град-домаќин се разочарани поради слабиот интерес за сместувања.

На почетокот на јуни, синџирот за брза храна „Шејк шак“ (Shake Shack), кој не е официјален спонзор на турнирот, ја намалил својата прогноза за кварталната продажба за да го исклучи евентуалниот позитивен ефект од Светското првенство.

Bloomberg Mercury

„Гледаме дека бројот на туристи се намалува во последните три или четири недели, особено во некои од големите градови во кои сме присутни“, изјави главниот извршен директор Роб Линч на конференција на 4 јуни. Компанијата претходно очекувала дека турнирот ќе ја зголеми посетеноста на нивните локации.

Според анкетата, речиси 60 отсто од испитаниците рекле дека нивното домаќинство нема воопшто да потроши пари за Светското првенство, вклучувајќи билети, гледање надвор од домот и сувенири.

Bloomberg Mercury