Марија Шарапова има пристап што ѝ служи добро. Како победничка на пет гранслем-турнири, таа не е само тениска шампионка туку е и архитектка на модерниот пристап на спортистите кон градењето деловни кариери надвор од спортскиот терен. Она што се сметаше за радикално кога Шарапова доминираше на тениските терени сега стана општоприфатено размислување: спортистите не треба да чекаат да ја завршат својата спортска кариера за да планираат како да го одржат својот животен стандард.
На неодамнешната конференција „Блумберг скринтајм“ (Bloomberg Screentime) во Лос Анџелес, таа ги сподели своите сознанија за тоа како ја претворила својата тениска слава во долгорочна деловна шанса.
Bloomberg Mercury
Клучниот деловен момент во кариерата на Марија Шарапова се случи во 2004 година, кога таа ја победи Серена Вилијамс и го освои Вимблдон. Тогаш седумнаесетгодишната Русинка стана светски бренд. Нејзиниот договор со компанијата „Моторола“ - кој планираше да го лансира иконскиот телефон „разр“ (Razr) - ја постави на реклами и на телевизија, отворајќи ѝ ја вратата за соработки со други мегабрендови. Нејзините спонзорства вклучуваа брендови како „ТАГ Хоер“ (TAG Heuer), „Порше“ (Porsche) и „Евијан“ (Evian).
„Тоа беше моментот кога сфатив дека спортот е многу повеќе од обична победа и пораз - тоа е бизнис“, изјави Шарапова, која сега има 36 години. „Имате платформа и глас“.
Откако ја заврши тениската кариера во 2020 година, таа почна да го гради тој деловен пат. Таа неодамна им се приклучи на групацијата хотели „Аман“ (Aman Hotels) како нивна прва глобална велнес-амбасадорка. Во тоа својство таа креираше повеќедневни програми за гостите, почнувајќи од почетокот на следната година со сесија во објектот „Аман“ во Пукет, Тајланд. Во основата на тој договор е нејзиното верување дека годините поминати на тенискиот терен - особено тренинзите и дисциплината што ја одведоа до шампионската титула - ја обезбедуваат рамката за врвен перформанс во сите видови кариери, особено за жените.
Шарапова истакна дека 80 отсто од женските извршни директори на листата „Форчн 500“ (Fortune 500) се занимавале со натпреварувачки спорт во одреден момент додека растеле. „Сите тие вештини што се изградени се дел од првото поглавје“, додаде таа.
Bloomberg Mercury
Таа исто така продолжува да го следи спортот што ја лансира во светска ѕвезда. Шарапова неодамна се појави во серијата „Точка на прекин“ (Break Point ) на Нетфликс, помагајќи да се објаснат менталитетот и искуството на најдобрите играчи на денешницата. Во една епизода таа особено го истакна не само успехот туку и процесот што го користи 19-годишната шампионка на УС опен, Коко Гауф.
„Ми се допаѓа начинот на кој победи“, изјави Шарапова. „Фактот што мораше да помине низ подеми и падови, па потоа да постигне нешто големо. Таа имаше сила за неуспех и за повторно враќање на сцената“.
.webp){kind=icon}
