„Голдман Сакс“ ѝ помага на Барселона да го рефинансира долгот за „Камп ноу“

ФК Барселона ја ангажира банката „Голдман Сакс“ (Goldman Sachs Group Inc.) за да се испитаат сите можности и да се намали цената на кредитот што го користи за тековното реновирање на стадионот „Камп ноу“, тврдат информирани извори.

Претставници од банката на Волстрит неодамна се сретнаа со некои од финансиерите за да ги ажурираат фазите и напредокот во изградбата. Клубот всушност сака да ги намали каматите со делумно рефинансирање на долгот од 1,45 милијарда евра, кредит што го зеде во 2023 година, а е наменет за финансирање на проектот, велат изворите, кои побараа да останат анонимни бидејќи информациите се приватни.

Клубот ќе почне да плаќа камата на овој долг во 2026 година. Две години подоцна треба да плати транша од 583 милиони евра. Каталонскиот гигант се обидува да ја искористи подобрената финансиска ситуација за да ги намали каматните стапки, велат изворите.

Портпаролите на ФК Барселона и на „Голдман Сакс“ одбија да коментираат.

Facebook

Барселона, која моментално води пред ривалот Реал Мадрид и е на врвот во шпанската Ла лига, штотуку се пласира во четвртфиналето на годинашната Лига на шампиони, ги намали трошоците за плати, потпиша нов договор со „Најк“ (Nike Inc) и веќе ги продаде ВИП-местата за реновираните објекти.

Проектот вклучува зголемување на капацитетот на „Камп ноу“ на повеќе од 100.000 седишта, изградба на нова арена „Палау Блауграна“ за спортови како кошарка и ракомет, како и други простори, меѓу кои и нов музеј.

Во последните две сезони, додека се во тек градежни активности, клубот играше на стадионот „Олимпико“ - помал и потешко пристапен стадион. Клубот првично имаше цел да се врати на „Камп ноу“ до крајот на минатата година. Иако тој рок е пробиен, Барселона сепак очекува сезонава да игра официјални натпревари на реновираниот стадион, како што беше наведено минатиот месец.