Манчестер јунајтед го напушта „Олд Трафорд“, гради нов стадион

Манчестер јунајтед (Manchester United Plc) планира да изгради стадион со 100.000 седишта во обид да фати чекор со модерните објекти што ги градат некои од најголемите европски клубови.

Премиерлигашкиот клуб најави дека планира да изгради нов стадион покрај постојниот „Олд Трафорд“ (Old Trafford). Историскиот стадион има убедливо најголем капацитет во лигата, со повеќе од 74.000 седишта, но поради покривот што прокиснува и другите дотраени елементи не може да биде конкурентен со модерните објекти што ги градат премиерлигашките ривали, вклучувајќи го и градскиот ривал Манчестер сити (Manchester City), како и лондонскиот Тотенхем (Tottenham Hotspur).

Нов стадион по 115 години

„Нашиот сегашен стадион ни служеше одлично во последните 115 години, но заостанува зад најдобрите спортски арени во светот“, изјави милијардерот и сопственик на Манчестер јунајтед, Џим Ретклиф. Клубот не објави никакви детали во врска со трошоците, ниту за начинот на финансирање на проектот.

Одлуката доаѓа по нешто повеќе од една година откако Ретклиф потроши околу 1,5 милијарда долари за да купи речиси третина од Манчестер јунајтед. Клубот се соочува со тешки резултати на теренот, па моментално е на 14-то место на табелата од вкупно 20 екипи во највисокиот ранг на англискиот фудбал. Надвор од теренот, Ретклиф го намалува бројот на вработени во обид да ги намали трошоците во услови кога Манчестер јунајтед се соочува со растечки долгови.

Акциите на Манчестер јунајтед во Њујорк паднаа за нешто повеќе од 20 проценти од почетокот на годинава до почетокот на неделава.

Од Манчестер јунајтед изјавија дека нивниот нов стадион може да создаде 92.000 работни места Извор: „Фостер и партнерс“ (Foster+Partners)

Според „Дилојт“ (Deloitte), Манчестер јунајтед во 2015 година беше втор клуб во Европа според приходите, но сега падна на четвртото место бидејќи го надминаа Манчестер сити и ПСЖ (Paris Saint-Germain), додека Реал Мадрид (Real Madrid) и натаму е на врвот.

Иако Манчестер јунајтед и натаму е еден од најголемите светски клубови во комерцијална смисла, сите негови ривали, вклучувајќи ги и Реал Мадрид и Барселона (FC Barcelona), вложија значителни износи во модернизација на своите славни стадиони за да ги зголемат приходите.

Илустрација на планираниот стадион Извор: „Фостер и партнерс“ (Foster+Partners)

Од Манчестер јунајтед наведоа дека нивниот нов стадион, во комбинација со поширока модернизација на локалното подрачје, може да создаде 92.000 работни места и да обезбедува за економијата дополнителни 7,3 милијарди фунти (9,4 милијарди долари) годишно.

Ретклиф претходно зборуваше за изградба на „Вембли на северот“ (Wembley of the North), алудирајќи на домот на англиската репрезентација во северозападниот дел од Лондон. Клубот размислува и за обнова на својот сегашен стадион.