Што имаат заедничко Руанда и Конго со Баерн, Арсенал и ПСЖ?

Руанда им се додворува на европските фудбалски клубови за да ги задржи спонзорските договори, додека Демократска Република Конго го зголемува притисокот врз федерациите да ги прекинат врските, обвинувајќи ја соседната земја дека го дестабилизира нејзиниот источен регион, инаку богат со минерали. 

На почетокот на месецов Конго побара од ФК Арсенал, ПСЖ и ФК Баерн Минхен да ја прекинат туристичката кампања „Посетете ја Руанда“ и да се откажат од „крвавото“ спонзорство, се наведува во писмото испратено до клубовите од министерката за надворешни работи Тереза ​​Кајиквамба Вагнер.

И покрај напорите на Конго, односите меѓу Руанда и европските клубови остануваат недопрени, тврди министерката за спорт Нели Муказајер. Иако на неодамнешните средби се разговараше за борбите во источно Конго, конфликтот не беше единствениот фокус на преговорите за партнерство, изјави таа.

„Од денес, Руанда нема проблеми со своите партнери и со партнерствата“, наведе Муказајер во интервјуто во четвртокот во Кигали, главниот град на Руанда. „Руанда останува посветена на овие партнерства и нивното влијание“.

Бунтовниците М23 ги зазедоа клучните градови и сега ја контролираат целата граница на источниот дел на Конго со Руанда по должината на езерото Киву. САД, ОК и ОН велат дека групата е поддржана и финансирана од Руанда. Обединетото Кралство ѝ се придружи на Белгија во суспендирањето на најголемиот дел од финансиската помош за Руанда.

Претседателот Пол Кагаме ги отфрли тврдењата дека воено ги поддржува М23.

Понуда за трка во Ф1

Оваа источноафриканска земја планира да спонзорира и тенис и моторни спортови. Во декември беше домаќин на церемонијата на доделување на наградите во Формула 1, каде што Кагаме објави дека Руанда ќе се кандидира да биде домаќин на првата трка во Ф1 на континентот по повеќе од три децении.

Руанда беше домаќин и на Африканската кошаркарска лига (БАЛ), заеднички проект на НБА и Меѓународната кошаркарска федерација (ФИБА).

„Во текот на викендот во Руанда започна Тур ду Руанда, каде што беше присутен и претседателот на Меѓународната велосипедска унија, што исто така беше знак дека партнерите на Руанда остануваат фокусирани на заедничката визија“, изјави министерката.

Руандската развојна агенција (од англиски: Rwanda Development Board) првично соработуваше со Арсенал во 2018 година, станувајќи официјален спонзор испишан на ракавите од дресовите на лондонскиот клуб. Наскоро следуваа слични договори со ПСЖ и Баерн Минхен. Руанда потпиша конечен договор со Арсенал во 2021 година вреден околу 40 милиони фунти (50,3 милиони долари), објави „Спортспро“.

Договорите го поттикнаа туризмот и им овозможија на играчите на клубот да учествуваат на тренерските сесии во оваа мала африканска земја. Спонзорствата „имаа големо влијание врз националниот бренд и туризмот во Руанда“, рече Муказајер. Приходите од туризмот се зголемија благодарение на брендот „Посетете ја Руанда“ (Visit Rwanda), медиумската покриеност и проширената видливост.