Како преживува Далас по заминувањето на Дончиќ

Генералниот директор на Далас Маверикс, Нико Харисон, претходно годинава ја бранеше својата одлука да ја замени ѕвездата Лука Дончиќ, пркосејќи на бесот на навивачите, кој на натпреварите прерасна во редовни скандирања „отказ за Нико“ (Fire Nico).

„Нема жалење за трансферот“, им рече Харисон на новинарите во вторникот при своето прво појавување во медиумите откако го размени Дончиќ со Лос Анџелес Лејкерс во февруари. „Некои од одлуките што ќе ги донесам нема да бидат популарни. Тоа е моја работа и морам да се придржувам до неа“.

Заминувањето на Дончиќ беше најголемиот тест за тимот откако казино-милијардерката Миријам Аделсон и нејзиното семејство ја купија контролата над тимот пред повеќе од една година од Марк Кубан, кој не беше консултиран за размената. Локално спортско радио беше преплавено со гневни приказни и коментари, навивачите одржаа лажен погреб за франшизата пред седиштето на тимот во ААЦ (American Airlines Center), а еден човек собра 50.000 долари за кампања против Аделсонови и Харисон.

Како што се разбрануваа емоциите, Маверикс предизвика дополнително незадоволство најавувајќи просечно зголемување на цените на сезонските карти за 8,6 проценти. Повеќе од еден месец подоцна, сепак, околу 75-80 проценти од сопствениците на билети ги обновија своите планови, што е резултат кој „навистина зборува сам за себе“, рече главниот извршен директор на Маверикс, Рик Велтс, на настан за медиумите.

Цените остануваат во средина во споредба со другите НБА-тимови, рече тој.

„Никогаш не би очекувал дека најавата за поскапување на сезонските билети ќе биде дочекана со аплауз“, рече Велтс. „Ќе кажам дека навистина се чувствуваме сигурно во одлуката што стои зад тоа“.

Семејството Аделсон го купи својот удел кога неговата казино-компанија „Лас Вегас Сендс“ (Las Vegas Sands Corp.) започна лобирање за легализација на одморалишта за игри на среќа во Тексас. Иако се чини дека тие напори нема да се исплатат, тимот останува „со полна брзина“ во намерата за изградба на нова арена, посочи Велтс.

Дончиќ (26) минатата сезона го водеше тимот до финалето на НБА-лигата и постојано се рангираше меѓу најдобрите стрелци во лигата. Претходно месецов се врати во Далас на својот прв натпревар во градот како играч на Лејкерси. Откако пред почетокот на натпреварот Маверикс пуштија видео во негова чест, што го доведе до солзи Словенецот, тој постигна 45 поени, а навивачите повторно скандираа „отказ за Нико“.

Маверикс ја заврши регуларната сезона со резултат 39-43, со што за влакно обезбеди пласман на плејин-турнирот. Ќе мора да победат уште два тима за да стекнат шанса да се пласираат во плејоф.

„Верувам дека навивачите ќе се вратат кога ќе победиме“, рече Харисон.

Во моментов нема коментари за веста. Биди прв да коментира...

Остави коментар