Среде финалето на НБА, во момент кога милиони гледачи очекуваат врвна продукција и препознатливи слогани на глобални брендови, најголемо внимание привлече реклама што не го носеше логото на „Најк“ (Nike) или „Гејторејд“ (Gatorade). Наместо тоа, спотот за финтек-стартапот „Калши“ (Kalshi), целосно изработен со помош на вештачка интелигенција, стана вирален феномен. Цената на продукцијата била само 2.000 долари, а времето на изработка 48 часа.
Рекламата го промовира „Калши“ како платформа за тргување врз основа на реални настани – од движење на цените на јајца до спортски резултати и природни катастрофи. Во спотот вештачката интелигенција (ВИ) генерира надреални сцени: човек што плива во јајца, вонземјанин со пиво и каубои на родео, сето тоа завршува со слоганот: „Светот полудел. Тргувај со тоа“.
Креативниот процес се свел на четири алатки: сценариото и листата на кадри се креирани со Џеминај од „Гугл“ (Google Gemini AI), визуализациите се генерирани со „Вео 3“ (Veo 3), а монтажата е завршена во „Кепкат“ (CapCut). Целиот проект го координирал еден човек – режисерот Пи Џеј Ацетуро, кој преку социјалните мрежи го опиша процесот на создавање: стотици команди (prompt), денови на генерирање и десетици избрани кадри, кои на крајот прават содржина од 30 секунди, емитувана за време на третиот финален натпревар на НБА.
Според американските медиуми, „Калши“ првично размислувал за класична продукција, но проценетите трошоци од 500.000 до 1.000.000 долари и неколкунеделните рокови ја направиле алтернативата со ВИ попривлечна. „Дизини“ (Disney) и „Еј-би-си“ (ABC), како носители на правата за НБА-пренос, го одобриле емитувањето – и тоа во ударен термин – и покрај несекојдневниот стил и пораката што кокетира со темата на спортско обложување.
Досегашниот досег се мери во десетици милиони прегледи, што го прави овој спот еден од најефикасните нискобуџетни рекламни потези на годината. За маркетинг-индустријата, ова е сигнал за подлабоки промени, велат голем број експерти. Вештачката интелигенција веќе не е само алатка за помош во продукцијата – таа станува централен мотор на кампањи што привлекуваат внимание, предизвикуваат смеа и стануваат вирални.
За стартапи како „Калши“, но и за маркетинг-тимовите под притисок од трошоци, ова може да означи нова ера – онаа во која брзината, креативноста и ВИ ги надминуваат традиционалните продукциски модели. Прашањето што сега се поставува е колку брзо и колку големи играчи ќе ја прифатат оваа промена.
.webp){kind=icon}
