Македонскиот фудбал без сезонски билети: Во регионот приказната е пољубовна

Сезонските билети за натпреварите на најпознатите фудбалски клубови во регионот веќе се продаваат, а цените се движат од 15 до 3.000 евра, во зависност од тоа кои фудбалски ѕвезди сакате да ги гледате во живо на теренот и дали ќе платите за обично или за ВИП-место на трибините. Исклучок е Македонија, каде што интересот за локалниот фудбал е мал, па затоа не се нудат сезонски билети.

За некои, тоа е само билет - за други, сезонскиот билет е завет за лојалност. Колку се подготвени да платат најлојалните и што добиваат со сезонски билет за фудбалските клубови во регионот Адрија? Ви носиме преглед на цените, поволностите и пораките што ви ги испраќаат вашите омилени фудбалски клубови.

Македонија

Како што веќе спомнавме, клубовите од Првата македонска фудбалска лига што се дел и од европската фудбалска сцена во оваа сезона не нудат сезонски билети. Во разговор со претставници на клубовите дознавме дека причините се различни: клупска реорганизација, реновирање стадиони, па дури, за жал, причина е и слабиот интерес за следење на фудбалските натпревари од трибините. Сепак, некои од клубовите планираат во иднина да пуштат сезонски билети во продажба.

ФК Вардар

ФК Вардар лани продаваше сезонски билети, но не како клуб, туку тоа го правеше навивачката група „Комити“, бидејќи тогаш клубот беше во многу турбулентен период, па навивачката група привремено ја презеде управата. Целта на продажбата на сезонски билети беше финансиски да му се помогне на клубот. Сега веќе обновената организација на клубот не пушти во продажба сезонски билети, а, како што информираат, отворена е можноста во иднина да се воведат.

Инаку, претходно во врвот на славата на ракометниот клуб Вардар и периодот кога РК Вардар двапати го освои трофејот на ЕХФ Лигата на шампиони, беше донесена одлука со сезонските билети за РК Вардар, кои експресно брзо се распродаваа, да може да се посетуваат и натпреварите на фудбалскиот клуб Вардар. Идејата, секако, беше да се зголеми поддршката на фудбалскиот клуб.

ФК Шкендија

Стадионот на ФК Шкендија во моментов е во фаза на реконструкција, која се одвива во етапи, па, според тоа, не е можно да се пуштат во продажба сезонски билети, но секако тоа е во план за наредниот период, информираат од клубот. Се очекува стадионот да биде готов за две-три години, а во меѓувреме клубот и натаму игра на домашен терен додека не дојде на ред реконструкцијата на клучната страна од стадионот. Тогаш, како што велат од тетовскиот клуб, веројатно натпреварите ќе се одржуваат во Гостивар, како најблизок град каде што има услови за ВАР-технологија, како што налагаат правилата.

ФК Силекс

ФК Силекс не продава сезонски билети, а нема ниту план да воведе. Причината за тоа е што клубот е од Кратово, мал град во Североисточна Македонија, кој според последниот попис има помалку од 6.000 жители. Овој фудбалски клуб воопшто не наплаќа карти за навивачите за следење на фудбалските натпревари бидејќи, како што велат оттаму, нема интерес. И покрај слободниот влез, многу мал дел од стадионот се исполнува. Според информациите од клубот, најчесто на трибините има 100-200 навивачи. Стадионот е со капацитет од 1.800 места, но дури и за време на најатрактивните натпревари имало максимум 700 навивачи.

Во другите земји од регионот Адрија, состојбата е малку поинаква. Голем број клубови нудат сезонски билети по различни цени во зависност од тоа дали станува збор за клупски членови, потоа изборот на седиште, привилегиите што ги обезбедува билетот, како и возраста на посетителите. Одиме со ред.

БОСНА И ХЕРЦЕГОВИНА

Во Босна и Херцеговина (БиХ) најевтините сезонски билети, кои чинат околу 30 евра, се за натпреварите на фудбалските клубови Борац, Зрињски и Вележ и се достапни за членовите на клубот, децата и пензионерите, како и за тие што имале сезонски билет минатата година. Најскапите билети се тие за ВИП-зоната на натпреварите на ФК Сараево и ФК Железничар - 2.000 конвертибилни марки, или околу 1.022 евра.

ФК Сараево на 15 јули започна со продажба на сезонски билети за претстојната сезона во официјалните продавници на клубот, а наскоро ќе биде можно билетите да се купат и преку интернет.

„Сезонскиот билет не е само билет за натпревар. Тоа е вашето место, вашиот поглед на теренот, вашиот клуб. Билетот важи за сите натпревари од домашното првенство и натпревари од Купот на Босна и Херцеговина, освен за евентуалните финални и европски натпревари“, објави ФК Сараево.

Од ФК Железничар појаснуваат дека за поповолна цена на билетот за пензионерите, неопходно е лично купување со задолжително презентирање доказ за примена пензија и лична карта заради внесување во системот.

Сезонските билети на ФК Борац за натпреварувачката 2025/2026 година се во продажба од 16 јуни и може да се купат во официјалната продавница на клубот во близината на Народниот театар во Бања Лука. Секој сезонски билет е поврзан со нумерирано седиште на трибината по ваш избор, а предуслов за купување е да се има членска карта на клубот за 2025 година.

Сезонските билети важат за сите натпревари на Градскиот стадион во Бања Лука (Премиерлига на Босна и Херцеговина, Куп на Босна и Херцеговина, Куп на Република Српска), како и за натпреварите во рамките на квалификациите за УЕФА Конференциската лига.

ФК Вележ нуди сезонски билети за сите заинтересирани по редовна цена, најевтините билети се за истокот, а најскапите за западот. Членовите на клубот добиваат одреден попуст во зависност од видот на членството (стандардно, сениорско, детско).

ХШК Зрињски започна со продажба на сезонски билети на 4 јули, а тие важат за сите натпревари од WWin лигата на Босна и Херцеговина, која оваа сезона носи нов систем на натпреварување со повеќе домашни натпревари (18) и повеќе дербија.

„Освен за сите натпревари од првенството, сезонскиот билет важи и за сите натпревари од Купот на Босна и Херцеговина што ќе се играат во организација на ХШК Зрињски, како и за сите пријателски натпревари на стадионот на ХШК Зрињски“, соопшти клубот, напоменувајќи дека цената на сезонските билети за членовите на клубот не е променета во споредба со минатата сезона.

Покрај попустот при купување, сите нивни членови што ќе обезбедат сезонски билет први ќе добијат можност да купат и билет за сите домашни европски натпревари на ХШК Зрињски. Седиштата ќе бидат обележани и нумерирани.

Сезонските билети може да се купат и онлајн, со можност за избор на седиште и онлајн плаќање или лично во „Фан шоп Зрињски“ со плаќање на самото место и пополнување формулар (со оваа опција е можен само избор на сектор).

„Зрињевци, заедно испишавме страници исполнети со големи победи, успеси, трофеи и гордост, а сега е време повторно да покажеме колку сме силни кога сме заедно. Нашето европско патување започна во Сан Марино и сите се надеваме дека тоа беше нашата прва од многуте европски станици оваа сезона. Сите на стадион! Зрињски има потреба од вас!“, изјавија од овој клуб.

СРБИЈА

ФК Црвена звезда продава сезонски билети по стара цена, почнувајќи од 9.500 динари (околу 79 евра) за сите натпревари на стадионот „Рајко Митиќ“, сите европски натпревари, како и потенцијално за европска пролет, заедно со сите домашни натпревари во Суперлигата, Купот на Србија и пријателските натпревари на „Маракана“.

Најевтиниот билет е за север, додека најскапиот е за трибината „Синиша Михајловиќ“, со попуст за тие што го обновуваат својот сезонски билет.

Ѕвездашите што имале премиум сезонски билет во претходната сезона имаат можност да го променат своето место во новата сезона, а постои и можност за купување на шест месечни рати, како и попуст од 10 проценти за групни купувања (за четири или повеќе лица).

За своите натпревари ФК Партизан нуди сезонски билети почнувајќи од 33 евра за јужната ложа, па до 1.000 евра за место во западната ложа. Бројот на ложи е ограничен и билетите може да се купат само во просториите на клубот, со приоритет на долгогодишните корисници.

Секој што ќе го обнови својот сезонски билет од претходната година има попуст на цената од 20 проценти, додека децата (8-16 години) и лицата над 65 години имаат попуст од 50 отсто.

Попустите не важат за јужната ложа, а билетите за деца може да се купат само со придружен сезонски билет од родител/старател.

„Сезонскиот билет важи за сите европски натпревари на стадионот на ФК Партизан, сите натпревари од српската Суперлига на домашен терен, како и куп-натпреварите што се играат дома. Купете сезонски билет и поддржете ги црно-белите на три фронта!“, порачаа од клубот.

Што се однесува до ФК Војводина, за првпат во својата 111-годишна историја, навивачите на „старата дама“ ќе може да купат сезонски билети за западната и источната трибина во официјалната продавница на ФК Војводина, на стадионот „Караѓорѓе“.

Цените на сезонските билети остануваат исти како и минатата година, почнувајќи од 14 евра (источна) за имателите на сезонски билети од лани, па до 38 евра за западната трибина. Продажбата на сезонски билети започна во понеделникот, на 21 јули.

ХРВАТСКА

И ГНК Динамо започна со продажба на годишни билети за натпреварувачката сезона 2025/2026. Годишниот билет важи за сите натпревари на стадионот „Максимир“ во лигата Суперспорт ХНЛ, Суперспорт Хрватски фудбалски куп и натпреварите во групната (лигашка) фаза од натпреварувањата на УЕФА, како и пријателските натпревари.

„Покрај фактот што годишниот билет овозможува влез на секој домашен натпревар на Динамо во новата сезона без чекање на билетарницата, цената на годишниот билет е поповолна од збирот на цените на поединечните билети за домашните натпревари во текот на целата сезона“, изјавија од Динамо.

Врз основа на заедничката одлука на клубот и навивачите на Динамо, поединечни билети за трибината „Сјевер доље“ можат да купат единствено членови и пријатели на клубот. 

Динамо (gnkdinamo.hr)

Правото први односно во претпродажба да купат билет го имаа тековните сопственици на сезонски билети што сакаат да ги задржат истите места и кои избираат нови места, додека од 14 јули преостанатите билети веќе се пуштени во слободна продажба.

Динамо нуди и семејни билети, како и купување на рати. Сезонскиот билет овозможува поволности во форма на 10 проценти попуст на сите производи во т.н. „Син агол“ со скенирање на QR-кодот од сезонскиот билет.

Сезонските билети на ХНК Хајдук се исто така во продажба, а со нивното купување обезбедувате место за сите натпревари од Суперспорт ХНЛ, 2-то и 3-то квалификациско коло од УЕФА Конференциската лига и за натпреварите од Суперспорт Хрватски фудбалски куп (освен финалето), кои ги организира ХНК Хајдук Сплит и се одржуваат на стадионот „Пољуд“ во сезоната 2025/2026.

Хајдук (hajduk.hr/pretplate)

 

Дополнителните бенефиции вклучуваат попуст од 12 проценти (без оглед на бројот на години на континуирано членство), а во случај ХНК Хајдук да се пласира во плејоф-рундата од квалификациите и во групната фаза на УЕФА Конференциската лига, имателите на сезонски билети ќе имаат право први да купат билети во рамките на претпродажба, со рокови и термини што ќе ги одреди ХНК Хајдук.

Влезниците може да се купат онлајн, во одделот за членство на „Пољуд“ (без оглед на статусот на членство) и на информативниот шалтер на „Пољуд“.

Влезниците за натпреварите на ХНК Риека може да се купат во претпродажба на билетарницата на западниот влез во тренинг-кампот на клубот. На денот на натпреварот билетите може да се купат на западната и источната билетарница на стадионот во термини што дополнително се објавуваат во зависност од времето на натпреварот. Билетите за натпреварите на Риека може да се купат и онлајн.

Сезонските билети ги вклучуваат сите домашни натпревари на ХНК Риека во Суперспорт ХНЛ и можат да ги купат само членови на ХНК Риека и КН Армада (се купуваат само на билетарница за северната трибина). Сопствениците на овие билети имаат право први да купат влезници за натпреварите под покровителство на УЕФА и Суперспорт Хрватски фудбалски куп.

Децата-членови под 16 години добиваат попуст од 50 проценти, како и пензионерите со потврда за пензија и членска карта на ХНК Риека, и тоа за на т.н. семејни трибини.

Цените за слободната продажба на билетите се наоѓаат во табелата подолу:

ХНК Риека (nk-rijeka.hr/ulaznice/)

 

Словенија

Минатиот викенд започна новата сезона на Првата Телемах лига со 10 екипи што се натпреваруваат за шампионската титула до мај. Минатата сезона просечниот број на гледачи по натпревар беше 1.383.

На интернет-страниците на словенечките клубови пишува дека навивачите сè уште можат да купат сезонски билети за повеќето од нив, а навивачите на некои клубови можат да купат и ВИП-билети. Па, колку чинат?

Најскапите билети се за минатогодишниот вицешампион НК Марибор, каде што сезонските билети за возрасни чинат 195 евра. НК Марибор им овозможува на навивачите да купат и премиум билет за 1.090 евра. Тоа вклучува можност за рано пристигнување, храна и пијалаци, како и настап на диџеј.

Сезонските билети за минатогодишниот победник на Првата Телемах лига, НК Олимпија Љубљана, чинат 160 евра за возрасни и 500 евра за ВИП-верзија на билетот. Исто толку чинат и сезонските билети во ФК Копер, а на навивачите им нудат два вида ВИП-влезници: сезонски ВИП-билет што чини 300 евра, а сезонската влезница за таканаречената почесна ложа чини 500 евра.

Голем број словенечки прволигашки тимови на навивачите им нудат само купување регуларни сезонски билети. Тие на НД Приморје Ајдовшчина и НК Целје чинат 150 евра за возрасен. Сезонските билети на годинашниот новодојденец во првата лига, НК Алуминиј Кидричево, чинат 100 евра за возрасни.

Сезонските билети на НК Домжале чинат најмалку меѓу словенечките прволигашки тимови - 80 евра. Сепак, општината и Заводот за спорт и рекреација на Домжале непосредно пред почетокот на новата сезона објавија дека стадионот во Домжале ќе биде затворен за гледачи најмалку една година поради оштетување на покривот на западната трибина. Тоа, според властите, ја загрозува безбедноста на посетителите и корисниците на објектот, објави „Горенски глас“. На тој стадион игра и НК Радомље, кој сè уште не ги објавил цените на сезонските билети за оваа сезона.

На гостински терен ќе ги игра домашните натпревари и НК Браво, кој се пресели на стадионот „Стожице“ поради градежни работи на стадионот „Жак“ во Шишка, Љубљана. Цената на сезонски билет за натпреварите на НК Браво е 100 евра за обична и 300 евра за ВИП-опција.

Последниот прволигашки тим, НК Мура има различни цени на билети за различни трибини. Сезонската влезница за постојните сопственици за главната трибина е 130 евра, а за другите трибини 110 евра. Цените на сезонските билети за нови клиенти се 160 евра за главната трибина и 130 евра за другите трибини.

- Текстот е напишан со помош на Мирјана Јовеска (Македонија), Аника Бечки (Србија) и Михаел Шмирмаул (Словенија).