НБА ја засилува европската офанзива, ангажира клучен сојузник од Волстрит

НБА-лигата е решена да реализира амбициозен проект за почнување ново големо европско кошаркарско натпреварување. Во тој потфат клучна улога ќе има „ЏП Морган“ (JPMorgan Chase), една од најголемите глобални банки, како нов стратешки партнер на лигата.

Џејми Дајмон, извршниот директор на „ЏП Морган“, лично се вклучил во проектот, што јасно покажува колку сериозно пристапува НБА кон освојување на европскиот пазар. „ЏП Морган“ ќе ја води финансиската структура и реализација, додека консултантската куќа РГ (Raine Group), позната по водењето на продажбата на фудбалскиот клуб Челси, ќе му дава стратешка поддршка на проектот.

 

Џејми Дајмон е лично вклучен во проектот/Bloomberg

Европските кошаркарски ѕвезди како Никола Јокиќ, Јанис Антетокумпо и младиот Виктор Вембанјама последниве години стекнаа статус на глобални ѕвезди, што дополнително го зголеми интересот за кошарката на Стариот Континент. Сепак, и покрај овој раст, кошарката сè уште зазема помалку од еден процент од вкупната вредност на европскиот спортски медиумски пазар, чија вредност се проценува на повеќе од 20 милијарди долари.

„Никогаш немало толку позитивна енергија околу европската кошарка како денес. Овој момент е идеален за реализација на нашите амбиции“, изјавил извор близок до НБА.

Детали за новото натпреварување

Новото натпреварување би вклучувало меѓу 14 и 16 клуба, од кои некои би имале постојан статус, а други би морале да минат низ квалификации. НБА веќе активно преговара со познати европски кошаркарски клубови како Реал Мадрид, Барселона и Олимпија Милано.

Европските играчи се едни од најголемите ѕвезди во НБА/NBA

Освен традиционалните кошаркарски клубови, НБА води разговори и со сопственици на големи фудбалски клубови како Манчестер сити и ПСЖ, кои се заинтересирани за основање кошаркарски франшизи на помалку развиени пазари. Се разговара и со инвеститори од приватниот капитал за можни вложувања.

Идејата на НБА да се прошири на европскиот пазар трае повеќе од една деценија. Уште во 2012 година, лигата започна со организирање ревијални натпревари низ Европа. Наскоро, комесарот на НБА, Адам Силвер, разговараше со британскиот премиер Кир Стармер за можноста за почнување европска лига.

Во меѓувреме НБА веќе има планови за организирање натпревари во Лондон и Берлин следната година, а до 2027 година се планирани и настани во Манчестер и Париз.

Закана за постојните лиги

Новата НБА-лига би можела сериозно да ја загрози постојната Евролига, која има традиција од 1958 година, а во сегашната форма постои од 2000 година. Обидите на приватниот фонд БЦП (BC Partners) да инвестира во Евролигата беа запрени откако станаа јасни намерите на НБА.

Според „Фајненшел тајмс“ (Financial Times), вклучувањето на „ЏП Морган“ јасно сигнализира колку сериозно пристапува НБА кон оваа иницијатива, препознавајќи потенцијално големо економско влијание врз европскиот спортски пазар.

Паралелно, и други проекти како натпреварување помеѓу Европа и Азија, зад кое стои Маверик Картер, деловен партнер на Леброн Џејмс, добиваат значајна поддршка – што дополнително укажува на потенцијалот за глобална експанзија на кошарката.

Во моментов нема коментари за веста. Биди прв да коментира...

Остави коментар