„Опен еј-ај“ нуди удел од пет отсто за американската влада

„Опен еј-ај“ (OpenAI) почнал прелиминарни разговори за тоа американската влада да добие удел од пет отсто во компанијата што стои зад „Чет ГПТ објави „Фајненшл тајмс“, повикувајќи се на два извора запознаени со разговорите.

Главниот извршен директор Сем Алтман и други раководители на компанијата го предложиле тој потег како дел од поширок аранжман според кој Вашингтон би поседувал по пет отсто од секој од водечките американски развивачи на вештачка интелигенција, пишува весникот. Тоа би можело да ги опфати и „Антропик“ (Anthropic PBC), како и берзански котираните лидери во секторот, „Гугл“ (Google) и „Мета“ (Meta Platforms Inc.), иако не е јасно дали тие компании би се согласиле со предлогот.

„Блумберг њуз“ претходно објави дека Алтман уште во 2025 година ја разгледувал идејата американската влада да има удели во големите компании за вештачка интелигенција во разговори со администрацијата на Доналд Трамп. Според „Фајненшл тајмс“, Алтман смета дека доделувањето удел на јавноста е најдобриот начин придобивките од бумот на вештачката интелигенција да се распределат пошироко.

Неговиот предлог доаѓа во време кога администрацијата на Трамп врши сè поголем притисок врз водечките американски компании за вештачка интелигенција. „Антропик“ минатиот месец ги суспендираше своите најмоќни модели откако владата ѝ нареди да го ограничи пристапот за странски државјани, повикувајќи се на причини од националната безбедност. Оваа недела Вашингтон ги укина ограничувањата за моделот Фејбл 5 (Fable 5) на „Антропик“, дозволувајќи негова поширока дистрибуција откако компанијата ги отстрани забелешките на администрацијата на Трамп поврзани со безбедноста.

Во меѓувреме, сè погласни се повиците владите и компаниите ширум светот да го намалат јазот меѓу оние што добиваат и оние што не добиваат од историскиот бум на вештачката интелигенција. Масовната изградба на центри за податоци ширум светот ги зголемува профитите и цените на акциите на производителите на чипови и давателите на компјутерски услуги, додека потрадиционалните индустрии заостануваат зад растот на берзите.

Во последните месеци се интензивираат и барањата дел од профитот да се распределува пошироко, бидејќи расте стравот дека вештачката интелигенција ќе замени голем број работни места, додека мал број компании, меѓу кои „Опен еј-ај“ и „Антропик“, се подготвуваат за потенцијални иницијални јавни понуди вредни билиони долари.

Американскиот претседател Доналд Трамп изрази интерес американската влада да поседува удели во водечките компании за вештачка интелигенција преку државен инвестициски фонд, кој дел од финансиските добивки би ги прераспределувал кон јавноста. Тој изјави дека разговарал со компании за таа идеја, но без да открие детали.

Сè уште не е јасно на кој начин владата би стекнувала удели во компании за вештачка интелигенција. Од враќањето на Трамп во Белата куќа, администрацијата инвестираше во околу десетина компании, меѓу кои и неколку од секторот за критични минерали, а се обврза да преземе удел до 10 отсто во производителот на чипови „Интел“ (Intel Corp.).