Кина се приклучува во трката за редизајн на паметните телефони во ерата на ВИ

„ЗТЕ“ (ZTE Corp.) првпат претстави линија на паметни телефони развиени во соработка со партнери, со вградени услуги за вештачка интелигенција, приклучувајќи се на сè поголемиот број кинески компании што се обидуваат повторно да ги осмислат мобилните уреди, ставајќи ја вештачката интелигенција во нивното јадро.

Државно поддржаната компанија за безжични комуникации оваа недела на најголемиот кинески технолошки самит во Шангај го демонстрираше „Навикс Ултра“ (NaviX Ultra), кој го претстави како првиот паметен телефон во светот со агентска вештачка интелигенција. Уредот е достапен во четири бои - црна, розова, бела и сина и со гласовна команда или притискање копче го активира популарниот ВИ-агент Дубао (Doubao) на компанијата „Бајтденс“ (ByteDance Ltd.).

Демонстрацијата следуваше по претставувањето на сличен уред од „Степ Фан“ (StepFun), кој користи сопствен оперативен систем и вграден агент Aмо. „Онор“ (Honor), производителот на паметни телефони што беше издвоен од „Хуавеи“ (Huawei Technologies Co.), исто така претставува ВИ-агент, базиран на модели развиени во соработка со „Алибаба“ (Alibaba Group Holding Ltd.). Тој ќе работи на новата генерација уреди што ќе бидат претставени подоцна годинава.

Низата нови производи е дел од глобалните напори повторно да се осмисли платформа стара две децении, која се соочува со растечки трошоци за меморија, инфлација и појавата на вештачката интелигенција. Минатата година „Опен еј-ај“ (OpenAI) плати 6,5 милијарди долари за да купи дизајнерско студио на легендарниот поранешен директор за хардвер во „Епл“ (Apple), Џони Ајв, започнувајќи проект за развој на уред заснован на вештачка интелигенција.

Овој тренд се појавува во време кога глобалниот пазар на паметни телефони се подготвува за најголемиот пад досега оваа година. Тоа особено силно ги погоди кинеските производители, бидејќи многумина продаваат поевтини уреди со помали профитни маржи и ограничена можност за зголемување на цените.

Според Артур Гуо, менаџер за истражувања во „ИДЦ“ (IDC China), идејата е во оперативниот систем да се вгради агентски слој што ќе ѝ овозможи на вештачката интелигенција самостојно да ги извршува барањата на корисникот во различни апликации.

Тој агент користи модели за вештачка интелигенција и од самиот уред и од облакот. Моделот што работи локално ги извршува задачите што често се користат и бараат минимално доцнење, додека моделите во облакот ги обработуваат покомплексните задачи, објасни Гуо.

Тоа е најновиот обид на кинеските производители да најдат нов извор на раст на забавениот пазар, каде што подобрите камери и телефоните со преклоплив екран веќе обезбедуваат само ограничен поттик за продажбата.

„ЗТЕ“ и „Бајтденс“ се надеваат дека ќе го прекинат повеќегодишниот циклус на постепени подобрувања на екраните, камерите и батериите. Заедно со конкурентите, тие сакаат да го искористат големиот интерес на кинеските потрошувачи за вештачката интелигенција.

Новите телефони со агентска вештачка интелигенција најверојатно дополнително ќе ја заострат битката за потрошувачите меѓу кинеските компании и „Епл“ (Apple Inc.), кој од крајот на минатата година бележи силно закрепнување на кинескиот пазар, а неодамна доби и одобрение од Пекинг да ја воведе услугата „Епл интелиџенс“ (Apple Intelligence) во Кина, преку партнерства со „Алибаба“ и „Баиду“ (Baidu Inc.).

„ЗТЕ“ го претстави прототипот на својот уред уште во декември, по цена од 3.499 јуани (516 долари), како дел од својот бренд „Нубиа“ (Nubia). Според локалниот медиум “Џиемјан“ (Jiemian), почетната серија од 30.000 уреди брзо била распродадена, по што нивната цена на пазарот за половни уреди се удвоила.

„Епл“ навистина донесе многу иновации на полето на вештачката интелигенција. Но кога станува збор за паметните уреди со ВИ, ние сме пред „Епл“, изјави директорот на „Нубиа“, Ни Феј, во видео објавено на неговиот профил на „Веибо“ (Weibo) во јуни.

Во петокот, Ни на Светската конференција за вештачка интелигенција во Шангај го демонстрираше својот производ пред постојани групи посетители. Облечен во црна маица со натписот „Нубиа, едноставно Дубао“ (Nubia, just Doubao it) на грбот, тој покажа низа функции - од уредување фотографии во реално време до креирање мапи и планирање патувања. Сепак, не откри детали за техничките спецификации на новиот уред, кои компанијата ќе ги соопшти подоцна годинава.

За оваа технологија да стане масовно прифатена, програмерите прво треба да го променат начинот на размислување, смета Ни. Наместо да додаваат нови функции, тие треба да создадат агент што ќе биде насочен кон извршување конкретни задачи, напиша тој во друга објава. Според него, многу од таканаречените ВИ-телефони што моментално се на пазарот само додаваат ВИ-функции врз постојниот систем, што всушност го прави користењето посложено.

„Телефоните со ВИ би можеле да бидат единствениот двигател на растот“ на кинескиот пазар оваа година, изјави Гуо. Тој додаде дека повеќе од половина од пазарот во 2026 година би можеле да го сочинуваат токму вакви уреди.

„Функциите со вештачка интелигенција можеби нема да бидат главната причина за купување, но потрошувачите веќе се навикнаа на практичноста што им ја овозможува ВИ“, рече Гуо.