Што е кинескиот стартап „Муншот“ и зошто ги потресе пазарите?

Кинескиот стартап „Муншот“ (Moonshot) на 17 јули претстави нов модел на вештачка интелигенција кој привлече глобално внимание, како поради неговите моќни способности, така и поради тоа што предизвика потреси на светските берзански пазари.

Моделот Кими К3 (Kimi K3 AI) на оваа компанија со седиште во Пекинг постигнува резултати на индустриски тестови кои се рамноправни со понудата на врвните играчи како „Опен еј-ај“ (Open AI) и „Антропик“ (Anthropic). Тоа е изненадувачки подем за компанија која досега дејствуваше во сенка на локалниот конкурент „Дипсик“ (DeepSeek).

Акциите на секторот за вештачка интелигенција и полупроводници забележаа пад поради загриженоста на инвеститорите дека подемот на кинеските ВИ компании би можел да ги принуди американските лидери, како „Антропик“, да ги намалат инвестициите. Тоа би можело да ја намали побарувачката кај индустриските гиганти како „Енвидија“, „СК Хајникс“ и „Самсунг“, чии цени на акциите паднаа по веста за „Муншот“.

Што е „Муншот“?

„Муншот“ на почетокот на 2023 година го основаше Јанг Жилин, поранешен професор на Универзитетот Цингхуа, кој претходно работел во „Мета“ и „Гугл“. Пред подемот на „Дипсик“, тој беше главното лице на кинеската ВИ сцена. Како поранешен студент на Универзитетот Карнеги Мелон, Јанг е автор на повеќе од десетина широко цитирани научни трудови за обработка на природен јазик. 

Кога одлучи да ја започне сопствената компанија и да го предизвика „Опен еј“, инвеститорите во ризичен капитал побрзаа да го финансираат. Проценката на вредноста на компанијата „Муншот“ набрзо достигна 20 милијарди долари, додека Кими стана најпопуларната кинеска алтернатива на ЧетГПТ.

По што е уште познат Јанг Жилин?

Основачот на „Муншот“ не е само академик. Овој 33-годишник е голем љубител на музиката, а компанијата ја исполнил со имиња на неговите омилени бендови. Салите за состаноци во седиштето на компанијата носат имиња како „Рејдиохед“, „Лед Цепелин“, „Квин“ и „Нирвана“. Претплатничките пакети на Кими се именувани според ознаките за темпо во класичната музика: Адаџо, Андате и Модерато. Стартапот првично на кинески се викал „Темната страна на Месечината“ (The Dark Side of the Moon), според омилениот албум на Јанг од групата „Пинк Флојд“.

Каков е деловниот модел на „Муншот“?

„Муншот“ настојува да собере до две милијарди долари нови средства, со проценка на вредноста од 30 милијарди долари, објави „Блумберг“ во јуни, што ја вбројува компанијата меѓу лидерите на кинескиот ВИ пазар. Развојниот тим на Кими е во процес на укинување на својата офшор структура за да го подготви теренот за иницијална јавна понуда на акции (ИПО) во Хонг Конг, откако Пекинг го заостри надзорот над излегувањето на компаниите на странски берзи.

Годишните повторливи приходи на компанијата - мерка за идната продажба - надминаа 200 милиони долари во април, поттикнати од наглиот раст на побарувачката за нивниот четбот и големите јазични модели. Компанијата продава различни претплатнички пакети за четботот и ја нуди својата основна технологија на деловни клиенти.

Каква закана претставува „Муншот“ за американските ривали?

„Муншот“ тврди дека најновата верзија на Кими е исклучително напредна во задачите за програмирање. Американските компании трошат стотици милијарди долари на ВИ инфраструктура за работа и подобрување на своите модели - при што најголемиот дел од парите одат кај производителите на чипови. Програмирањето е една од најпрофитабилните услуги на компаниите со напредни модели, што ги зголемува приходите на „Антропик“ и „Опен еј-ај“ пред нивните планирани излегувања на берзата. Ако „Муншот“ понуди одржлива алтернатива, тоа би можело да го разниша деловниот модел на неговите конкуренти.

Кинеските модели веќе агресивно ги намалија цените на своите услуги и така ги надминаа американските ривали. Пондерираната просечна цена за извршување стандардизирана интелигентна задача со помош на моделите Кими 2.6 или Дипсик В4 Флеш се движи од 33 центи до само 2 цента, во споредба со 2,75 долара за истата задача кај моделот Клод Фејбл 5 на „Антропик“, според податоците на страницата АА (Artificial Analysis).

Најновата понуда на „Муншот“, споредено со тоа, има повисока цена. Цената на моделот Кими К3 на истата скала се проценува на 95 центи.

 

Играат ли кинеските ВИ компании фер?

Постои можност Кими и други компании во Кина веќе да имале корист од работата и инвестициите на компанијата „Антропик“. Претходно годинава, „Антропик“ ги обвини „Муншот“, „Дипсик“ и „Мини Макс“ дека ги тренирале своите модели врз основа на можностите на моделот Клод - во процес познат како „дестилација“ – преку „кампањи од индустриски размери“ кои „ги прекршуваат нашите услови за користење и регионалниот пристап“, се наведува во објава на блог од февруари. „Муншот“ не одговори на барањето за коментар во врска со обвинувањата на „Антропик“.

Во своето најново соопштение, „Муншот“ се претстави како аутсајдер со помали шанси:

„И покрај тоа што генерално е исклучително конкурентен модел, К3 сепак покажува забележително заостанување во корисничкото искуство во споредба со моделите Клод Фејбл 5 и ГПТ 5.6 Сол.“