„Дипсик“ ја стопира новата инвестициска рунда по виралните изјави на основачот

„Дипсик“ (DeepSeek) им соопштил на потенцијалните инвеститори дека привремено го запира процесот на собирање капитал во втората рунда на финансирање, според извори запознаени со ситуацијата.

Одлуката доаѓа само неколку дена откако изјавите на основачот Лианг Венфенг за конкуренцијата меѓу САД и Кина во развојот на вештачката интелигенција (ВИ) станаа вирални.

Кинеската компанија усно ги информирала дел од инвеститорите дека во следните денови нема да потпишува инвестициски договори, иако тоа претходно било очекувано. Сепак, процесот би можел да продолжи во подоцнежна фаза.

Објавите во медиумите за ставовите на Лианг наводно се една од причините за паузата. Тој, според кинеските медиуми, зборувал за зависноста на развојот на ВИ од чиповите на „Енвидија“ (Nvidia) и за тоа дека Кина сè уште заостанува зад САД во технолошкиот напредок.

„Дипсик“ не ги коментираше информациите.

Преговорите со инвеститорите продолжуваат, а компанијата би можела повторно да го активира процесот на финансирање. Не е познато дали сите потенцијални инвеститори биле информирани за привременото запирање.

Новата рунда започна само неколку недели по првата, во која „Дипсик“ собра околу 7 милијарди долари од инвеститори како „Тенсент“ (Tencent Holdings), КАТ (Contemporary Amperex Technology) и Националниот фонд за инвестиции во индустријата за вештачка интелигенција.

Компанијата планираше да собере најмалку 10 милијарди јуани дополнителен капитал, со проценета вредност пред новата инвестиција од најмалку 480 милијарди јуани.

Подготовки за излегување на берза

Покрај собирањето капитал, „Дипсик“ започна подготовки за иницијална јавна понуда на акции (ИПО) и би можел да поднесе барање за излегување на берза уште оваа година.

Компанијата привлече големо внимание бидејќи минатата година претстави ВИ модел кој ја изненади индустријата. „Дипсик“ покажа дека е можно создавање напредни ВИ системи со значително помалку компјутерски ресурси од претходно очекуваното.

Успехот на компанијата покажа дека кинеските фирми можат да бидат конкурентни на водечките компании од Силициумската долина и покрај американските ограничувања за извоз на напредни чипови.

Новите средства треба да помогнат во проширување на компјутерските капацитети потребни за развој и работа на ВИ системите.

 

Приоритет се истражувањата, а не брзата заработка

Раководството на „Дипсик“ им порачало на инвеститорите дека главен приоритет ќе останат фундаменталните истражувања во областа на вештачката интелигенција, а не краткорочната комерцијализација.

Лианг Венфенг ветил дека компанијата ќе продолжи да развива ВИ модели со отворен код, со долгорочна цел создавање општа вештачка интелигенција.

Според него, технолошкиот напредок е поважен од брзото остварување профит.

По последната рунда финансирање, богатството на Лианг се зголеми повеќе од двојно. Според Bloomberg Billionaires Index, неговото богатство сега се проценува на околу 36 милијарди долари, со што стана најбогатиот основач на компанија за развој на ВИ модели во светот.