Договорите на „Енвидија“ вредни 750 милијарди долари ги разгоруваат стравовите од циркуларната вештачка интелигенција

„Енвидија“ (Nvidia Corp) работи на нова рунда договори за вештачка интелигенција вредни повеќе од 750 милијарди долари, забрзувајќи ги инвестициите за кои скептиците предупредуваат дека вештачки ја зголемуваат побарувачката и проценките низ целата индустрија.

Партнерството со јужнокорејскиот конгломерат „СК Груп“ (SK Group), откриено доцна во петокот, значи дека компаниите ќе работат повеќе од 500 милијарди долари едни со други, соопшти „Енвидија“. Највредната компанија во светот е исто така во преговори да обезбеди поддршка од дури 250 милијарди долари за да му помогне на „Опен еј-ај“ (OpenAI) да изнајми компјутерска моќ од проект за центар за податоци во САД, во она што би било меѓу најголемите финансиски договори на производителот на чипови со клиент.

Големи имиња од „Голдман Сакс груп инк.“ до инвеститорот Мајкл Бери, познат по „Биг шорт“ (Big Short), со месеци предупредуваат на „циркуларната“ природа на ваквите договори, каде што „Енвидија“ финансира и зема удели во компании и проекти што ги користат нејзините чипови. И сепак, темпото на зделките само се забрзува. Стравот од овие трансакции е дека тие можат да ја искриват побарувачката, да поттикнат лошо донесување одлуки и да ги зголемат загубите ако вештачката интелигенција не успее да оствари профит за оние што инвестираат стотици милијарди долари во технологијата.

„Енвидија“ е исто така во преговори за финансирање на 350 милијарди долари од купувањата на своите чипови од „Опен еј-ај“ за американскиот проект, според лице запознаено со ова прашање. Во понеделникот, компанијата соопшти дека направила „значителна“ инвестиција во „Сејф Суперинтелиџенс“  (Safe Superintelligence Inc), стартапот за вештачка интелигенција ко-основан од поранешниот главен научник на „Опен-еј-ај“, Илја Сутскевер. Луѓе запознаени со ситуацијата рекоа дека „Енвидија“ посветила 5 милијарди долари.

„Додека инвестициите и партнерствата на ‚Енвидија‘ ја зајакнуваат довербата во долгорочните градби на вештачка интелигенција, инвеститорите остануваат загрижени за циркуларното финансирање“, рече Гари Тан, менаџер за портфолио во „Олспринг Глобал Инвестментс“ (Allspring Global Investments). „Капиталот сè повеќе се користи за финансирање на идните клиенти со вештачка интелигенција и распоредување на инфраструктура.“

Акциите на „Енвидија“ паднаа за дури 5,5 проценти на берзата во Њујорк во понеделник, на 195,44 долари. А трошоците за заштита на долгот на „Енвидија“ од неплаќање на обврските се зголемија најмногу досега. Тие добија дури 0,14 процентни поени, на 0,82 процентни поени годишно.

„‚Енвидија‘ сака да се осигури дека растот ќе продолжи со ова темпо“, рече аналитичарот на „Блумберг Интелиџенс“ (Bloomberg Intelligence), Мандип Синг, на Блумберг ТВ. „Тоа е голем ризик за ‚Енвидија‘. Ако работите се запрат, дури и ако е за шест месеци, тоа нема да оди многу добро за нив.“

Најновите потези на „Енвидија“ се надополнуваат на низата договори што ги склучи низ целиот екосистем во текот на изминатите неколку години. Доминантниот производител на процесори со вештачка интелигенција зеде удели во развивачи како што се „Опен еј-ај“ и други производители на чипови како „Марвел“ (Marvell Technology Inc), во обид да го поттикне растот на целата индустрија.

Индустриските конкуренти се одлучуваат за слични аранжмани. „Гугл“, чии проекти за вештачка интелигенција го вклучуваат Џемини „Gemini“, се согласи да ги забави плаќањата за закуп на пет локации на центри за податоци на „Антропик“, помагајќи му на конкурентот на „Опен еј-ај“ да добие заем во вредност од 35 милијарди долари.

Ваквите трансакции оставија многу компании за вештачка интелигенција сè повеќе испреплетени, потенцијално изложувајќи го секторот на системски шокови. Меѓу централните загрижености е и растечкото ниво на долг на индустријата, при што многу компании за вештачка интелигенција го зголемуваат задолжувањето за да ги финансираат своите проекти за центри за податоци и чипови.

Како дел од договорот на „Енвидија“ со „СК груп“, компаниите ќе се здружат за да изградат повеќе од 2 гигавати центри за податоци за вештачка интелигенција на Корејскиот Полуостров. Тоа е приближно количината на енергија потребна за напојување на 1,5 милиони домови. Првата од овие таканаречени фабрики за вештачка интелигенција, изградена од „СК Телеком“ (SK Telecom Co), ќе се отвори следната година.

„Ова е златното доба за Кореја“, рече главниот извршен директор на „Енвидија“, Џенсен Хуанг, во интервју за Блумберг ТВ. „Нивниот бизнис со полупроводници е во подем. Нивниот индустриски бизнис е во подем. Знаете, ова е земја која има способност да му помогне на светот да изгради инфраструктура за вештачка интелигенција.“

Потенцијалниот договор што е во дискусија со „Опен еј-ај“ би му помогнал на креаторот на ЧетГПТ да изнајми центар од 10 гигавати, вреден 500 милијарди долари, што „СБ Енргџи“ (SB Energy), подружница на „Софтбенк Груп“ (SoftBank Group Corp), го развива во Охајо, велат луѓе запознаени со ова прашање.

„Енвидија“ може да обезбеди гаранција од дури 250 милијарди долари за лабораторијата за вештачка интелигенција и разговара за финансирање на купувања на „Опен еј-ај“ во вредност од 350 милијарди долари, рече еден од луѓето. Преговорите се во рана фаза и би можеле да пропаднат или условите за финансирање може да се променат, рекоа луѓето. „Волстрит џурнал“ ги објави разговорите претходно.

„Гарантирањето на ‚Енвидија‘ за поголем дел од долгот на центарот за податоци на ‚Опен еј-ај‘ го продлабочува финансирањето на добавувачите кое веќе е под лупа“, рече Били Леунг, инвестициски стратег во „Глобал Екс Менаџмент“ (Global X Management). „Ова е исто толку потсетник за финансискиот притисок во изградбата на вештачката интелигенција, колку што е и сигнал за побарувачка.“

Доколку се реализира, секоја поддршка од „Енвидија“ за „Опен еј-ај“ може да помогне во решавањето на загриженоста на доверителите во врска со проширувањето на финансирањето на некотиран и непрофитабилен бизнис за постојано растечките компјутерски потреби на развивачот на ЧетГПТ.

Исто така, му помага на основачот на „Софтбенк“, Масајоши Сон во амбицијата да игра централна улога во развојот на вештачката интелигенција. Како и со операциите на центри за податоци со висок левериџ, бизнисот на „Софтбенк“ се повеќе се потпира на продолжувањето на брзата потрошувачка за вештачка интелигенција. Голем дел од заработката на јапонската компанија сега зависи од добивките од вреднувањето што произлегуваат од „Опен еј-ај“и изгледите за евентуална блокбастер почетна јавна понуда.

„Софтбенк“ до октомври вложи речиси 65 милијарди долари во „Опен еј-ај“ и потпиша мостовен заем од 40 милијарди долари - едно од најголемите мостовни финансирања досега во Азиско-пацифичкиот регион - за да ја финансира таа инвестиција. Но, растечкиот облог и зависноста на компанијата од компанија во која има ограничена контрола предизвикува вознемиреност кај инвеститорите.

За „Енвидија“, поблиските врски со „СК Груп“ ќе помогнат да се подобри пристапот до мемориски чипови за компјутери. Единицата „СК Хајникс“ (SK Hynix) на таа компанија и јужнокорејскиот конкурент „Самсунг“ (Samsung Electronics Co). се двата најголеми добавувачи на клучните компоненти - чипови кои се во недостиг поради глобалното градење центри за податоци за вештачка интелигенција. „Енвидија“ ќе ѝ помогне на „Хајникс“ да дизајнира идни мемориски чипови со висок пропусен опсег, напор што ќе помогне да се гарантира пристап до снабдување.

 

Вредноста на договорот, над 500 милијарди долари, вклучува пари што „Енвидија“ ќе ги потроши за купување мемориски чипови, како и купувања од страна на „СК Груп“ на суперкомпјутерите на „Енвидија“, рече Хуанг во интервјуто. „Значи, меѓу нас, ќе направиме бизнис во вредност од половина билион долари“, рече тој.

Доцна во петокот, „Енвидија“ исто така соопшти дека ќе инвестира милијарда долари во „Навер“ (Naver Corp) за да помогне во финансирањето на центар за податоци со вештачка интелигенција во изградба во Јужна Кореја. Финансирањето ќе му овозможи на „Навер“, давател на интернет и услуги во облак, повеќе од трипати да ја зголеми големината на објектот. Локацијата - развиена заедно со американската фирма за приватен капитал „Брукфилд“ (Brookfield Corp) - ќе го користи хардверот за ВИ компјутери на „Енвидија“. Акциите на „Навер“ скокнаа за повеќе од 8 проценти во Сеул.

Хуанг тврди дека инвестициите на „Енвидија во компании како „Опен еј-ај“ и „Антропик“ќе му помогнат не само на неговиот бизнис, туку ќе обезбедат и поврат на инвестициите. „Енвидија“, исто така, склучи инвестициски договори со компании за центри за податоци, вклучувајќи ги „ИРЕН“ (IREN Ltd), „КорВив“ (CoreWeave Inc) и „Небиус“ (Nebius Group NV). Заедно, „Енвидија“ објави повеќе од 540 милијарди долари слични договори само оваа година, исклучувајќи го потенцијалниот нов договор со „Опен еј-ај“.

Хуанг се спротивстави на идејата дека нејзините договори се кружни по природа, дури и кога ги поддржува токму компаниите кои се главни купувачи на неговите чипови.

„Тоа е мал процент од износот на пари што тие на крајот мора да го соберат“, рече тој за инвестицијата во „КорВив“во јануари. „Идејата дека е кружна е - смешна.“