Експерт од „Опен еј-ај“ стана главен научник во „Мета“ на Закерберг

Шенгџија Жао стана главен научник на т.н. група за суперинтелигентна вештачка интелигенција (ВИ) во компанијата „Мета“ (Meta Platforms Inc). На таа позиција го именуваше Марк Закерберг, откако Жао во јуни премина од „Опен еј-ај“ (OpenAI) во „Мета“.

Жао беше дел од тимот кој работеше на оригиналната верзија на популарниот четбот ЧетГПТ (ChatGPT). Сега ќе помага во водењето на истакната група во рамки на „Мета“, чија цел е развој на нови ВИ модели кои ќе можат да извршуваат задачи еднакво добро или подобро од луѓето. Жао ќе му одговара на Александру Ванг, поранешен извршен директор на „Скејл еј-ај“ (Scale AI), кој исто така ѝ се приклучи на „Мета“ во јуни како директор за вештачка интелигенција.

„Мета“ агресивно инвестира во доведување ВИ експерти со цел да развие нови модели и да остане релевантна во трката за доминација во областа на вештачката интелигенција со ривали како „Опен еј-ај“ и „Гугл“. Компанијата со месеци бараше главен научник за оваа група. Жао е еден од повеќе од десет поранешни вработени во „Опен еј-ај“ кои во последниве два месеца му се приклучија на ВИ тимот на „Мета“.

„Шенгџија е коосновач на нашата нова лабораторија и од првиот ден го води научниот тим“, напиша Закерберг, извршниот директор на „Мета“, во објава на Threads. „Сега, кога регрутацијата оди добро и тимот се оформува, решивме да ја формализираме неговата лидерска улога.“

Жао е коавтор на оригиналната научна статија за ЧетГПТ, а исто така бил клучен истражувач на првиот модел за резонирање на „Опен еј-ај“, наречен o1, кој придонесе за популаризацијата на „chain-of-thought“ техниката (техника во развојот на ВИ што му овозможува на моделот да решава посложени проблеми со прикажување на чекори во размислувањето, наместо директно да даде конечен одговор, н.з.) во лабораториите на „Дипсик“, „Гугл“ и други. Наведен е како еден од над 20-те основачи-истражувачи на проектот.

Јан Лекун, уште еден истакнат истражувач во областа на вештачката интелигенција, кој е повеќе од една деценија во „Мета“ и ја носи титулата главен научник, ќе продолжи да работи во компанијата како главен научник на внатрешната истражувачка ВИ група FAIR, наведува извор запознаен со ситуацијата. Тој исто така ќе му одговара на Ванг, додава истиот извор.

Во моментов нема коментари за веста. Биди прв да коментира...

Остави коментар