„Гугл“ под истрага на ЕУ за злоупотреба на доминантната позиција поради ВИ-алатките

„Гугл“ (Google) се соочи со истрага на Европската Унија поради сомнежи дека американскиот технолошки гигант ја злоупотребува својата пазарна моќ при воведувањето на алатките за вештачка интелигенција – само неколку дена откако слична истрага беше поведена и против „Мета“ (Meta Platforms Inc.).

Во потег што веројатно ќе предизвика критики од Белата куќа, европските регулатори соопштија дека ќе испитаат дали единицата на „Алфабет“ (Alphabet Inc.) наметнувала неправични услови на креаторите на содржини и дали ѝ давала предност на сопствената ВИ-технологија на модели во однос на конкурентите.

Европската комисија со седиште во Брисел ќе испита и до кој степен генерирањето ВИ-прегледи (AI Overviews) и режимот ВИ-мод (AI Mode) на „Гугл“ се базира на содржина од веб-издавачи и дали тие се соодветно платени за тоа.

Bloomberg

„Овој случај повторно е силен сигнал за нашата посветеност да ги заштитиме онлајн медиумите и другите креатори на содржини, како и да обезбедиме фер конкуренција на пазарите во подем на ВИ“, изјави европската комесарка за конкуренција Тереза Рибера во Брисел во вторникот.

„Гугл“ соопшти дека постапката на ЕУ „ризикува да ја задуши иновацијата на пазарот, кој е поконкурентен од кога било. Европејците заслужуваат да ги користат најновите технологии и ние ќе продолжиме да работиме тесно со медиумската и креативната индустрија додека тие преминуваат во ерата на ВИ“.

Новата истрага следува по септемвриската казна од речиси 3 милијарди евра (3,5 милијарди долари) против „Гугл“ поради наводно фаворизирање на сопствените услуги за огласна технологија во однос на конкурентите, казна што го разгневи американскиот претседател Доналд Трамп, кој ја нарече „дискриминаторска“.

Минатата недела администрацијата на Трамп остро реагираше на казната за платформата Х на Илон Маск, изречена поради прекршувања на правилата за онлајн содржини. Комисијата исто така предизвика реакции од другата страна на Атлантикот откако одобри истрага за тоа како алатките на „Мета“ во Ватсап (WhatsApp) можеби неправично ги попречуваат конкурентските ВИ-услуги.

Претставниците на Трамп особено се фокусираа на низата скапи казни на ЕУ против големите технолошки компании, вклучувајќи и повеќе од 9,5 милијарди евра казни против „Гугл“ и посебна одлука „Епл“ (Apple) да ѝ плати на Ирска заостанат данок од 13 милијарди евра.

Трамп се закани дека ќе воведе нови царини и извозни ограничувања за напредна технологија поради ова прашање. Американските претставници велат дека нема да ги намалат царините од 50 отсто на челик и алуминиум сè додека ЕУ не ги олабави своите технолошки правила.

Технолошкиот гигант се соочи и со други казни од ЕУ, меѓу кои и 4,13 милијарди евра за Андроид (Android) и 2,42 милијарди евра за сузбивање на конкурентите во пребарувањето за купување. Казната од 1,49 милијарда евра за „Адсенс“ (AdSense) беше поништена минатата година.

Покрај тоа, „Гугл“ продолжува да се соочува со поширока регулаторна контрола според Законот за дигитални пазари во Брисел. Законот стапи во сила во 2023 година и има цел да ги задржи најголемите светски технолошки платформи во рамките на правилата.

Според традиционалните правила за конкуренција на ЕУ, регулаторите можат да им наредат на компаниите привремено да прекинат деловни практики за кои постои сомнеж дека се незаконски, но овие наредби може да бидат оспорени пред судовите на Унијата во Луксембург.

Конечните казни за прекршување на правилата за конкуренција на ЕУ може да достигнат и до 10 отсто од глобалните годишни приходи, иако ретко се движат на тој максимум, особено кога наводните прекршувања траеле кратко. „Гугл“ сега ќе мора да достави решенија што ќе ја смират загриженоста на регулаторите.