Пентагон му даде пристап на „Опен еј-ај“ до класифицирана мрежа по спорот со „Антропик“

„Опен еј-ај“ (OpenAI) се согласи да ги распореди своите модели за вештачка интелигенција во класифицираната мрежа на Министерството за одбрана на САД, откако конкурентската компанија „Антропик“ (Anthropic PBC) го наруши односот со Пентагон поради загриженост околу надзор и автономно оружје.

Главниот извршен директор на „Опен еј-ај“, Сем Алтман, доцна во петокот изјави дека постигнал договор со министерството кој ги одразува принципите на компанијата за забрана на „домашен масовен надзор и човечка одговорност при употреба на сила, вклучително и кај автономни оружени системи“. Стартапот, исто така, вградил заштитни механизми за да обезбеди моделите да функционираат како што е предвидено како дел од распоредувањето, напиша Алтман во објава на социјалната мрежа X.

„Опен еј-ај“ одби да коментира дали услугите за министерството ќе ја заменат работата што претходно ја извршуваше „Антропик“. Министерството за одбрана не одговори веднаш на барањето за коментар.

Само неколку часа претходно, Пентагон ја прогласи „Антропик“ за ризик во синџирот на снабдување — потег што може да има длабоки последици врз бизнисот на компанијата и да го продлабочи конфликтот меѓу стартапот за вештачка интелигенција и одбранбените власти околу заштитните механизми на нејзината технологија.

Во објава на Икс, министерот за одбрана Пит Хегсет наведе рок од шест месеци во кој „Антропик“ треба да ги пренесе ВИ-услугите на друг добавувач. „Американските војници никогаш нема да бидат заложници на идеолошките ставови на големата технологија“, напиша Хегсет. „Оваа одлука е конечна.“ Неговата објава следеше кратко откако претседателот Доналд Трамп на социјалните мрежи напиша дека им наредил на федералните агенции да ја прекинат соработката со „Антропик“.

„Антропик“, која има поставено услов нејзините производи да не се користат за надзор врз Американци или за изведување напади без човечка вклученост, во петокот соопшти дека „никакво заплашување или казнување од Министерството за војна нема да ја промени нашата позиција за масовен домашен надзор или целосно автономно оружје“.

Пентагон во текот на оваа недела ѝ понудил услови на „Антропик“ кои вклучувале дел од формулациите што компанијата ги предложила во врска со надзорот и автономијата, изјави лице запознаено со ситуацијата, кое побарало да остане анонимно бидејќи разговорите не биле јавни. Но според „Антропик“, понудените услови не гарантирале доволно цврсто дека Министерството нема самостојно да ги укине или игнорира ограничувањата кога ќе процени дека тоа е неопходно, изјави изворот.

Договорот на „Опен еј-ај“ со Пентагон се заканува дополнително да го продлабочи јазот меѓу администрацијата на Трамп и „Антропик“, која доби силна поддршка во Силиконската Долина, каде технолошки работници застанаа на страната на компанијата и ги повикаа другите големи технолошки компании, вклучително и „Амазон“ (Amazon.com Inc.) и „Мајкрософт“ (Microsoft Corp.), да го сторат истото.

Алтман во својата објава се осврна на прашањата поврзани со надзорот и автономното оружје, наведувајќи дека Министерството за одбрана се согласило со принципите на компанијата и ги вклучило во договорот со „Опен еј-ај“, притоа барајќи од министерството „истите услови да им ги понуди на сите ВИ-компании, кои според нив секој би требало да биде подготвен да ги прифати“.

Bloomberg

Дарио Амодеи, извршен директор на „Антропик“, претходно работел во „Опен еј-ај“ и ја напуштил компанијата во 2020 година, делумно поради загриженост дека стартапот ѝ дава предност на комерцијализацијата и брзината пред безбедноста.

„Опен еј-ај“ започна како непрофитна организација, а минатата година се трансформираше во поконвенционална профитна компанија. Иако првично ја забрануваше употребата на својата технологија за воени цели, компанијата во 2024 година ја измени политиката и дозволи таква примена.

Компанијата исто така го отстрани зборот „безбедно“ од својата мисија, која сега гласи дека целта е „да обезбеди вештачката општа интелигенција, ВИ-системи што генерално се попаметни од луѓето, да биде од корист за целото човештво“.

И „Антропик“ и „Опен еј-ај“ сè повеќе го насочуваат вниманието кон профитабилноста додека се подготвуваат за иницијални јавни понуди уште оваа година, користејќи го засилениот интерес на инвеститорите за ВИ.

Претходно во петокот, „Опен еј-ај“ објави дека обезбедил 110 милијарди долари во зделка што ја вреднува компанијата на 730 милијарди долари, што претставува најголема рунда на финансирање досега за креаторот на Чет ГПТ (ChatGPT) и дополнително го поддржува неговиот скап притисок за обезбедување повеќе компјутерска моќ и талент за развој на ВИ. „Антропик“ претходно овој месец обезбеди 30 милијарди долари во рунда на финансирање од дел од истите инвеститори што вложуваат и во „Опен еј-ај“.

Амодеи и Алтман со години јавно се судираат. Најнеодамна, на самит за ВИ во Њу Делхи, двајцата застанаа еден до друг покрај премиерот Нарендра Моди, но за разлика од останатите учесници на сцената, не се приклучија кон симболичниот гест на заедничко држење за раце.