И онака лошата година за криптовалутите тргна на полошо, откако хакирањето на бајненс коин (Binance Coin) насочено кон 568 милиони долари стана најновиот во низата безбедносни инциденти кои ги зафатија дигиталните средства.
Хакерскиот напад се случил на мост меѓу блокчејнови и проблемот „сега е под контрола“, објави во петокот на „Твитер“, Чангпенг Жао, милијардерот кој е соосновач на Binance, најголемата светска крипто-берза.
Специјалисти за безбедност во крипто-фирмите „Блоксек“ (BlockSec) и „Парадигм“ (Paradigm) посочија оти блокчејн податоците укажуваат на тоа дека некој хакирал два милиона токени на Binance Coin - исто така познат како BNB - во две трансакции. Тоа е еквивалентно на околу 568 милиони долари по тековните цени за виртуелната валута.
Околу 87 милиони долари биле преместени надвор од екосистемот на Binance, но хакерот не можел да ги извади останатите средства бидејќи бил суспендиран т.н. Binance Smart Chain, соопшти главниот извршен директор на BlockSec, Јаџин Жоу. Блокчејнот подоцна бил рестартиран. Останатите токени се на паричникот што го користел хакерот, но се замрзнати на мрежата Binance, објасни Жоу.
Жао од Binance во претходна објава на „Твитер“ посочи дека „проценката за влијанието“ на инцидентот е околу 100 милиони долари. Најмалку 7 милиони од украдените средства веќе биле замрзнати, изјави портпарол.
Околу две милијарди долари се изгубени во крипто-хакирања во текот на годинава, многу од нив извршени од групи поврзани со Северна Кореја. Платформите познати како cross-chain мостови што се користат за пренос на токени преку различни блокчејнови се популарна цел за напади.
Екосистемот на Binance е меѓу оние од највисок профил. Жао на „Твитер“ порача дека „со голема веројатност, Binance ќе го покрие секој фонд кој хакерите ќе го извлечат“.
.webp){kind=icon}