Старите биткоин фондови крвават пари по појавата на ЕТФ-овите во САД

Лудилото по спот-биткоин ЕТФ-ови (од англиски: exchange traded funds – фондови со кои се тргува на берза) во САД зема голем данок на инвестициските производи стари со години кои го предводеа патот во носењето криптовалути во светот на фондовите.

Инвеститорите досега во 2024 година повлекле вкупно 738 милиони долари од биткоин инструмените на германските, канадските и шведските берзи, според податоците од „Коин Шерс Интернешнл“ (CoinShares International Ltd.). Откако биткоинот забележа нови највисоки вредности на сите времиња, поголемиот дел од инвеститорите најверојатно се префрлаат од еден биткоин производ на друг во потрага по пониски трошоци за управување, според Стефан Оулет, главен извршен директор во „ФРНТ Фајненшл“ (FRNT Financial Inc).

„Американските инвеститори, кои претходно успеаја да купат биткоин ЕТП (од англиски: exchange traded product – производи со кои се тргува на берза) на други берзи, се многу веројатни кандидати да ги вратат своите инвестициски долари во американските ЕТФ-ови“, вели Оулет.

Компанијата „Прпоус Инвестментс“ (Purpose Investments Inc.) со седиште во Торонто, која ја лансираше својата понуда на биткоин ЕТФ на берзата во Торонто на почетокот на 2021 година, наплатува надоместок за управување од еден процент - четири пати повисок од еквивалентниот фонд на „Блекрок“ (BlackRock Inc.), кој беше одобрен на почетокот на јануари годинава. Додека „Блекрок биткоин траст“ (BlackRock Bitcoin Trust) има над 12 милијарди долари приливи од почетокот на годината, „Прпоус Инвестментс“ (Purpose Investment) забележа одливи од 369 милиони долари, според податоците на „Коин Шерс“.

Сличните понуди од „ХБТ Провајдер АБ“, шведски издавач на ЕТП во сопственост на „Коин Шерс“ забележаа нето-одливи од 182 милиони долари од почетокот на годината.

Џејмс Батерфил, шеф на истражување во „Коин Шерс“ призна дека дел од одливот би можел да биде „засилен“ од американските инвеститори, но рече дека тоа може да се должи и на подигањето на профитот од долгорочните инвеститори во период кога биткоинот урива рекорди.

„Сите овие пазари имаат ЕТП веќе многу години, за разлика од САД, така што веројатно постои елемент на подигање на профитот на овие нивоа“, рече Батерфил.

Се чини дека темпото на одливи се намалува. Кај германските, канадските и шведските крипто-производи, околу 50 проценти од одливите од почетокот на годинава се случија во јануари, при што неодамнешните одливи од почетокот на месецов сочинуваат само околу 26 проценти од вкупното годишно повлекување, според податоците на „Коин Шерс“.

Во моментов нема коментари за веста. Биди прв да коментира...

Остави коментар