Системот за кој се обезбедени околу четири милиони долари од Светската банка, преку Проектот за забрзување на транспортот и трговијата на Западен Балкан, се очекува да ги олесни трговските и транспортните постапки во државата. Според најавите, тендерот за имплементација на системот ќе биде објавен во првото тримесечје од годинава, а во процесот ќе бидат вклучени вкупно 16 државни институции.
Целта на новиот систем е целосна дигитализација на издавањето дозволи и лиценци и нивното плаќање, како и колективно користење на податоците од страна на институциите и можност за комуникација со институциите на другите земји. Се очекува дека тоа ќе доведе до намалување на трошоците и времето потребно за завршување на извозните и увозните постапки, што ќе овозможи подобрување на условите за водење бизнис и зголемување на конкурентноста на македонските компании.
„Ова ќе овозможи олеснување на трговијата, забрзување на транспортот, забрзана интеграција во ЕУ, а со тоа и зголемување на конкурентноста на македонските компании и подобрување на условите за водење бизнис. Преку интерпретација на системот ќе се овозможи унапредување на анализата на ризик за сите институции што се вклучени во издавањето дозволи во прекуграничната трговија, со што ќе се намали бројот на контроли, а истовремено ќе се зголеми квалитетот на услугите“, изјави директорот на Царинската управа, Стефан Богоев.
Проектот се фокусира и на имплементацијата на интелигентен транспортен систем на јужниот дел од коридорот 10, како и на модернизацијата на граничните премини. Преку воведувањето систем за видеонадзор и препознавање на регистарските таблички, ќе се зголеми автоматската контрола врз патничките и товарните возила, што ќе го олесни и забрза преминот на границите.
Вицепремиерот за економски прашања Фатмир Битиќи истакна дека бизнис-секторот многу наскоро ќе ги почувствува придобивките од овој систем, кој е критичен за подобрување на бизнис-климата во државата.
„Фактот што ние во регионот имаме премногу граници што претставуваат вистински тесни грла, кои реално се објективни пречки за водење бизнис со кои нашите компании се соочуваат, е првата и основна причина зошто кога почнавме да го спроведуваме овој проект мислевме на тоа да се олесни транзитот на капитал и работна сила на една страна и стоки и услуги на друга страна“, изјави Битиќи.
„Насочувањето кон паметни системи и процеси е нешто што не само што ги модернизира урбаните средини туку и креира посебна интеграција на национално ниво, што значително ги подобрува условите за инвестициите“, велат од Царинската управа.
.webp){kind=icon}
