„Дипсик“ ја заобиколил забраната за набавка на чипови од „Енвидија“?

Американските власти истражуваат дали „Дипсик“ (DeepSeek) купил напредни чипови од „Енвидија“ (Nvidia) во Сингапур преку трети лица, со што ги избегнал американските ограничувања за продажба на чипови што се користат за развој на вештачка интелигенција, велат извори запознаени со истрагата.

„Дипсик“ неодамна го лансира четботот Р1 (R1), кој во некои аспекти функционира речиси исто како и сличните ботови во САД, што укажува дека Кина е понапредна во трката за развој на вештачка интелигенција отколку што се сметаше претходно. Некои инженери беа воодушевени од способностите на Р1, а „Дипсик“ се пофали со ниските трошоци и ефикасноста на платформата, поради што неговите конкуренти шпекулираа дали е направен со помош на западна технологија.

Властите во Белата куќа и ФБИ исто така се обидуваат да утврдат дали „Дипсик“ користел посредници од Сингапур за купување чипови што САД ги забраниле за продажба на Кина, велат извори што сакаат да останат анонимни.

„Дипсик“ не одговори веднаш на барањето за коментар. Портпаролот на „Енвидија“ во изјава наведе: „Упорно инсистираме нашите партнери да дејствуваат во согласност со сите важечки закони и ако добиеме какви било информации спротивни на тоа, ќе преземеме соодветни мерки“. Компанијата на почетокот на неделата даде изјава за „Дипсик“, во која наведе дека верува дека кинеската фирма не ги прекршила американските ограничувања.

Портпаролот на ФБИ одби да коментара, додека портпаролот на Белата куќа не одговори веднаш на барањето за коментар. Амбасадата на Сингапур во Вашингтон не била достапна надвор од работното време. Хауард Лутник, изборот на претседателот Доналд Трамп за челник на Министерството за трговија, во средата навести дека „Дипсик“ ја избегнал забраната за извоз на чипови.

„Чипови од ’Енвидија’, од кои купиле стотици, го напојуваат нивниот модел Дипсик“, рече Лутник. „Тоа мора да престане. Ако сакаат да се натпреваруваат со нас, нека се натпреваруваат, но нека престанат да ги користат нашите алатки за да се натпреваруваат со нас. Затоа ќе бидам многу одлучен во тоа“.

Р1, кој „Дипсик“ со седиште во Хангжу го лансира на почетокот на месецов, може да имитира човечко размислување и претставува потенцијална закана за пазарот на кој доминираат „Опен еј-ај“ (OpenAI) и конкуренти од САД, што би можело да предизвика загуба на капиталната вредност на претпријатијата во износ од еден билион долари.

„Дипсик“ поведе дебатата за ефикасноста на американските обиди да ја исклучат Кина од напредната технологија. Ограничувањата, кои опфаќаат различни чипови и алатки користени за нивно производство, имаат цел да ги забават напорите на Кина да ја развие својата индустрија за полупроводници и да го спречат Пекинг да пристапи до модели на вештачка интелигенција што би можеле да ѝ донесат воена предност на таа земја.

Сингапур како земја за заобиколување? 

Додека „Дипсик“ не објасни конкретно кои полупроводници за вештачка интелигенција ги користел за развој на своите модели, неговите истражувачи рекоа дека моделот В3 (V3), кој беше издаден минатиот месец, е обучен на 2.048 чипа „енвидија Х800“ (Nvidia H800). „Енвидија“ го направи Х800 за кинескиот пазар, откако администрацијата на претседателот Бајден го прекина пристапот на Кинезите до верзиите на чипови со поголема моќ.

Американските власти потоа во октомври 2023 година ги забранија Х800 и другите чипови на „Енвидија“ за Кина, поради што „Енвидија“ разви уште еден, помалку моќен чип, наречен Х20. Администрацијата на Трамп сега започнува разговори за тоа дали треба да ги ограничи и чиповите Х20. Со ова се продолжува политичката расправа што започна кон крајот на мандатот на претседателот Џо Бајден, известува „Блумберг“. Истовремено, додека САД ги проширија чиповите што не може да ѝ се продаваат на Кина, го проширија и географскиот опсег на трговските правила, кои ќе опфатат поголем број земји.

Во 2023 година администрацијата на Бајден воведе ограничувања за повеќе од 40 земји за кои властите сметаа дека би можеле да послужат како посредници во снабдувањето со чипови за Кина, вклучувајќи ги поголемиот дел од Блискиот Исток и некои земји од Југоисточна Азија – но не и Сингапур.

На почетокот на годинава властите на администрацијата на Бајден дополнително ги проширија правилата за да опфатат поголем дел од светот, освен мал број американски сојузници. За големи пратки во Сингапур, како и за повеќето земји, сега е потребна дозвола. Пратките што се помали и содржат околу 1.700 процесори бараат само известување.

Пратките во Сингапур сочинуваат околу 20 проценти од приходите на „Енвидија“, но „поголемиот дел пратки поврзани со приходите од Сингапур одат на локации што не се во Сингапур, а пратките во Сингапур беа многу мали“, наведуваат од „Енвидија“.

Портпаролот на „Енвидија“ изјави дека приходите поврзани со Сингапур не укажуваат на пренасочување кон Кина. „Нашите документи известуваат за локациите на нашите клиенти според тоа каде е издадена фактурата, а не каде оди пратката. Многу од нашите клиенти имаат деловни субјекти во Сингапур и ги користат за пренасочување на пратките наменети за САД и Западот“.

Во писмо до советникот за национална безбедност Мик Волц, шефовите на панелот на американскиот Конгрес фокусиран на Кина ги наведоа приходите на „Енвидија“. Претставниците Џон Муленар и Раџа Кришнамурти напишаа: „За земји како Сингапур треба да важат строги барања за издавање дозволи ако не се подготвени да ги спречат пратките во Кина“.