Вештачката интелигенција е жедна за струја, ќе го промени ли тоа „Дипсик“?

Кинеската компанија за вештачка интелигенција „Дипсик“ (DeepSeek) предизвика тектонски промени на американскиот енергетски пазар. Овој модел за ВИ, за кој се тврди дека троши само дел од енергијата во споредба со досегашните решенија, отвора нови прашања за одржливоста на предвидената потрошувачка на енергија во секторот за вештачка интелигенција. Аналитичарите од „Џефрис“ (Jefferies) предупредуваат дека овој развој може да ги доведе во прашање долгогодишните процени според кои ВИ до 2035 година треба да сочинува 75 проценти од вкупната енергетска потрошувачка во САД.

„Развојот на ’Дипсик’ ги доведува во прашање значајните проекции за потрошувачката на електрична енергија во САД“, напиша тимот на аналитичари од „Џефрис“, предводен од Жулиен Думулин-Смит. Како што наведува „Блумберг“ (Bloomberg), преиспитувањето на очекувањата за склучување нови договори за дата-центри дојде во критичен момент, што резултира со пад на акциите на водечките енергетски компании како „Вистра“ (Vistra) и ЦЕ (Constellation Energy).

ЧетГПТ и неговиот енергетски отпечаток

Растечката потрошувачка на енергија на моделите за ВИ стана клучна тема, а разликите во пристапот помеѓу Дипсик и ЧетГПТ јасно покажуваат колку енергетската ефикасност може да варира во рамките на индустријата.

Додека Дипсик тврди дека ги намалува енергетските потреби, неговиот конкурент ЧетГПТ на „Опен еј-ај“ (OpenAI), поставува предизвик од сосема спротивната страна. Потрошувачката на енергија на овој јазичен модел ги шокира аналитичарите. Имено, како што минатата година напиша „Бест брокерс“ (BestBrokers) во извештај, ЧетГПТ годишно троши 226,8 гигават-часа енергија, што е доволно да се наполнат 95 проценти од електричните автомобили во САД или да се напојат цела Финска и Белгија за еден ден.

Секое поединечно прашање до ЧетГПТ троши 2,9 ват-часа енергија, речиси десет пати повеќе од стандардното пребарување на „Гугл“ (Google). Тоа значи дека процесирањето на 78 милијарди прашања годишно чини околу 29,7 милиони долари. Освен тоа, обуката на моделот ГПТ-4 (GPT-4), кој има билиони параметри, бараше дури 62,3 гигават-часа енергија во текот на сто дена, што е доволно да се напојува Ирска повеќе од два дена.

Секое поединечно прашање до ЧетГПТ троши 2,9 ват-часа енергија Depositphotos

 

Одржливост и индустрија за ВИ

 

Моделот на „Дипсик“ покажува како иновациите можат да донесат значајни промени во енергетската ефикасност, но останува прашањето дали зголемената ефикасност само ќе поттикне поголема потрошувачка на енергија? Феноменот познат како Јевонсов парадокс истакнува дека поголемата ефикасност често води до поголема потрошувачка, бидејќи технологијата станува подостапна и сè поинтегрирана во секојдневниот живот.

Сузан Су, инвеститорка во чиста енергија, за „Блумберг“ нагласи дека зголемената ефикасност само ќе го забрза ширењето на технологијата за ВИ. „Кога велам експоненцијално, навистина мислам на повеќекратен раст – повеќе случаи на употреба и поголема побарувачка, бидејќи одеднаш ВИ станува многу подостапна“, рече Су, истакнувајќи ја парадоксалната природа на индустријата.

Истовремено, Ерик Гимон од аналитичкиот центар ЕИ (Energy Innovation) повлече паралела помеѓу сегашниот бум на ВИ и балонот „дотком“ (Dotcom) од раните 2000-ти години. „Тогаш телекомуникациските компании како ГЦЛ (Global Crossing Limited) вложуваа милијарди во инфраструктура, потценувајќи ги можностите за зголемување на ефикасноста. Тоа беше пример за претеран оптимизам во побарувачката и потценување на способноста да се направи повеќе со помалку“, рече Гимон за „Блумберг“.

Растечката побарувачка за енергија веќе предизвика политички реакции. Минатата недела американскиот претседател Доналд Трамп најави користење итна енергетска декларација за забрзување на изградбата на електроцентрали на фосилни горива во близина на центрите за податоци. Таквите потези дополнително нагласуваат како индустријата за ВИ влијае на глобалните политички и инфраструктурни одлуки.

Со сето тоа, дата-центрите, како основни компоненти на инфраструктурата за ВИ, веќе сега се меѓу најголемите потрошувачи на енергија во светот. Тие трошат два процента од глобалната електрична енергија, а според процените, тој удел би можел да се удвои до 2030 година.

 

Растечката побарувачка за енергија веќе предизвика политички реакции Bloomberg

На пример, „Вертив“, глобален лидер во инфраструктурни решенија за дата-центри, во соработка со „Енвидија“ (Nvidia) развива иновативни системи како што се модуларни и имерзивни системи за ладење што ја оптимизираат потрошувачката на енергија.

Потсетуваме на претходниот разговор со Карстен Винтер, претседател на „Вертив“ за регионот EMEA, кој рече дека целта на овие технологии е да им овозможат на компаниите да ги зголемат капацитетите со намалување на еколошкиот отпечаток. „Со растечката побарувачка за вештачка интелигенција, дата-центрите стануваат клучни за глобалната економија. Сепак, нивната енергетска ефикасност мора да биде приоритет. Нашиот развој е насочен кон решенија што овозможуваат одржливо ширење на индустријата за ВИ“, изјави Винтер за „Блумберг Адрија“.

Зголемувањето на енергетската потрошувачка за ВИ неизбежно носи предизвици за одржливоста, но и можности за иновации. Региони како Централна и Источна Европа, поради поволните услови, би можеле да станат нови жаришта за изградба на дата-центри, додека развојот на енергетски ефикасни технологии ќе биде клучен за зачувување на рамнотежата помеѓу напредокот и зачувувањето на животната средина.

Технологијата на „Дипсик“ би можела да ги преобрати досегашните парадигми во индустријата на вештачка интелигенција, а ЧетГПТ потсетува колку е енергетски интензивен сегашниот напредок во овој сектор. Додека иновациите ветуваат поефикасни решенија, пазарот ќе мора да се соочи со предизвиците на одржливоста и долгорочната стабилност.

Како што ВИ продолжува да го обликува светот, клучниот предизвик ќе бидат балансирањето на технолошкиот напредок и зачувувањето на животната средина. Дали ВИ-секторот ќе најде начин да го намали својот енергетски отпечаток или ќе сведочиме на нова трка за ресурси, останува да видиме.