Студенти од Факултетот за информатички науки и компјутерско инженерство (ФИНКИ) ќе му помагаат на Министерството за образование и наука (МОН) во унапредување на дигиталното работење и забрзување на процесот на дигитализација на образованието, за што денеска потпишаа меморандум за соработка министерката Весна Јаневска и деканот на ФИНКИ, Боро Јакимовски.
Под менторство на нивните професори, студентите ќе помагаат во тековното одржување на дел од информациските системи и дигиталните платформи со кои располага МОН и ќе учествуваат во креирање и имплементација на нови технолошки решенија и дигитални услуги во воспитно-образовниот процес.
Студентите нема да добиваат паричен надомест, туку активностите ќе бидат во рамките на нивната пракса, која, рече Јаневска, генерално е мала на сите факултети и практичниот дел од едукцијата ќе треба да се зајакне преку ваков тип заемна корист.
Заедничка прес-конференција на МОН и ФИНКИ
МИА
„Во согласност со договореното, дополнително факултетот ќе организира и спроведува едукативни активности во форма на обуки, работилници и семинари за стручно усовршување на вработените во Министерството. Од друга страна, МОН ќе поддржи практично усовршување на студентите од овој факултет. Предвидени се и заеднички стручни и научни истражувања и анализи, како и организација на хакатони и натпревари за младите во информатичко-комуникациската сфера“, рече министерката на прес-конференцијата на која беше соопштена оваа соработка.
Таа посочи дека со вклучувањето на студентите значително ќе се подигнат ефикасноста и ефективноста на работењето и на Министерството и на факултетот, што ќе биде во интерес на граѓаните. Таа ги повика и другите јавни институции и високообразовни установи да иницираат ваков тип соработка.
„Да им дадеме можност на младите да се докажуваат и практично да се надградуваат уште додека студираат и со тоа да им го поедноставиме настапот на пазарот на трудот по дипломирањето“, додаде Јаневска.
Таа посочи дека МОН, како и целата администрација во државата, има потреба од поддршка во ИТ-сферата. Како што рече, МОН има многу вработени, но нема капацитет за да може да ги извршува своите секојдневни потреби и да ги испорача услугите кон граѓаните односно училиштата и другите образовни установи, особено во ера на неопходна дигитализација на општеството.
Деканот на ФИНКИ, Боро Јакимовски, рече дека нивниот факултет и досега му помагал на МОН, но отсега во активностите ќе бидат вклучени и студентите за кои, како што нагласи, убеден е дека имаат потенцијал не само да препознаваат туку и да креираат решенија за сложени предизвици во ИТ-сферата.
.webp){kind=icon}
