.webp){kind=icon}
Компанијата „Неуралинк“ (Neuralink Corp.) на Илон Маск има цел во рок од шест месеци да започне со поставување компјутерски мозочни импланти со големина на паричка кај пациенти, објави компанијата на настан во своето седиште во Фримонт, Калифорнија, во средата вечер.
„Неуралинк“ го рафинира производот, кој се состои од мал уред и жици, заедно со робот што издлабува парче од черепот на пациентот и го вградува апаратот во мозокот. Според Маск, преговорите со американската Администрација за храна и лекови минале доволно добро за компанијата да ја постави целта за први испитувања кај луѓе во наредните шест месеци.
Во типичен манир за претпријатијата на Маск, „Неуралинк“ веќе оди напред, насочувајќи се кон импланти и за други делови од телото. За време на настанот, Маск откри дека работи на два главни производа, покрај интерфејсот мозок-компјутер. Тоа е развој на импланти што можат да се постават во 'рбетниот мозок и потенцијално да го вратат движењето кај некој што страда од парализа. Има и очен имплант, наменет за подобрување или обновување на видот.
„Колку и да звучи чудесно, ние сме уверени дека е можно да се врати функционалноста на целото тело на некој што има оштетен 'рбетен мозок“, рече Маск на настанот. Осврнувајќи се кон работата на „Неуралинк“ во однос на видот на пациентите, тој рече: „Дури и ако никогаш порано не гледале, уверени сме дека ќе прогледаат“.
Целта на интерфејсот мозок-компјутер, познат како BCI, првично е да му овозможи на лице со нарушена состојба, како што е амиотрофичната латерална склероза (АЛС) или пациент што страда од последици од мозочен удар, да комуницира преку своите мисли. Компанијата го покажа тоа со мајмун, кој „телепатски пишува“ на екранот пред себе. Уредот на „Неуралинк“ ги преведува невронските осцилации во податоци што може да се интерпретираат од компјутер.
Маск се надева дека еден ден уредот би можел да стане мејнстрим и да овозможи пренос на информации помеѓу луѓето и машините. Тој долго време тврди дека луѓето можат да бидат во чекор со напредокот што го прави вештачката интелигенција единствено со помош на компјутерски корекции и додатоци на телото.
„Толку сте навикнати да бидете де факто киборг“, рече Маск. „Но ако комуницирате со вашиот телефон, вие сте ограничени“.
Како што беше случај со минатите настани на „Неуралинк“, некои од работите што ги демонстрираа Маск и неговиот тим веќе се постигнати во академски услови. Критичарите на компанијата долго време го обвинуваат Маск дека го пренагласува напредокот на „Неуралинк“ и премногу ветува во однос на тоа што може да направи технологијата во блиска иднина, па и во подалечна.
Bloomberg
Технологијата за интерфејсот мозок-компјутер е истражувана и унапредувана од академските институции со децении. Влегувањето на Маск во арената, сепак, поттикна бран инвестиции во стартапи и помогна да се поттикне оваа сфера со побрзо темпо.
Неколку слични стартапи се пред „Неуралинк“ кога станува збор за испитувања на луѓе. На пример, „Синкхрон“ (Synchron Inc.) успеа да вгради мал уред сличен на стент во мозокот на пациенти во Австралија и во САД. Производот им помогнал на пациентите што не можеле да се движат или зборуваат да комуницираат безжично преку компјутери и нивните мисли. „Онвард“ (Onward Inc.), исто така, направи иновација за враќање на одредени движења кај луѓето со повреди на 'рбетниот мозок.
