Министерството за одбрана на САД на 75 милиони долари ја зголеми вредноста на договорот со Џоби Авиејшн (Joby Aviation), компанија која развива летечки таксија.
Вредноста на договорот меѓу калифорниската компанија за производство на електрични летала со вертикално полетување и слетување (eVTOL - electric vertical takeoff and landing vehicles) и Министерството за одбрана на САД е двојно зголемена од првично договорената зделка вредна 30 милиони долари. Договорот со таа државна институција ќе трае до 2025 година, а сега ја вклучува и американската морнарица. Вашингтон неодамна се заинтересира за електричните летала бидејќи се поевтини за одржување од традиционалните хеликоптери, а згора на тоа имаат нула емисија на штетни гасови.
„Континуираната соработка со државата е важна референца на пазарот“, рече Пол Скиара, претседател на Одборот на директори на Joby. Тој додаде дека вклучувањето на дополнителни воени сили во тестирањето на леталата ќе му помогне на Joby да го подобри производството, перформансите и другите функционалности пред да понуди јавни такси услуги, што тие имаат за цел да го направат до 2024 година.
Joby со американските воздухопловни сили последните две години соработува на тестирање на прототип на летало кое превезува четири патници со брзина од 200 милји на час (околу 320 километри) и има досег од 150 милји (околу 240 километри) со едно полнење. Овие лесни летала не се наменети за борба и ќе се користат главно за воена логистика, која вклучува итни медицински интервенции и набавки. Според изјавата на Скиара, армијата и морнарицата ги препознале eVTOL како транспортни средства од големо значење.
Како и другите иноватори во eVTOL сферата за урбан транспорт како Archer Aviation, Beta Technologies и слично, Joby мора да ги надмине регулаторните и логистичките пречки пред да може вистински да лета комерцијално.
За да добие комерцијални сертификати во САД и Обединетото Кралство и да го зголеми производството, Џоби ќе мора да работи за да спречи несреќи како онаа што се случи претходно годинава во комплексот за тестирање во Калифорнија. Компанијата тогаш соопшти дека инцидентот нема да влијае на нивните долгорочни планови бидејќи, кога се случил, леталото во голема мера ја надминало максималната брзина со која ќе лета обезбедувајќи транспортни услуги.
Пазарната вредност на Joby е 3,68 милијарди долари, а објавувањето на финансиските резултати се очекува в четврток.
.webp){kind=icon}
