Фондот на Кушнер поддржан од Блискиот Исток ги зголеми средствата на 6,2 милијарди долари

„Афинити партнерс“ (Affinity Partners), инвестициска фирма управувана од Џаред Кушнер која располага со средства од државни фондови од Блискиот Исток, лани ја зголемила својата имотна вредност за речиси 30 отсто, покажува регулаторен документ во кој увид имал Блумберг.

Имотот на фондот пораснал на 6,2 милијарди долари на крајот на 2025 година, при што растот се должи на добивките остварени од дел од инвестициите.

Кушнер, кој е во брак со најстарата ќерка на американскиот претседател Доналд Трамп, повторно се најде под лупа на законодавците во последните денови поради работењето на фондот, откако неодамна беше именуван за нов пратеник на Трамп за мир на Блискиот Исток. Сепак, загриженоста за можен судир на интереси ја следи оваа фирма уште од нејзиното основање, кратко по првиот мандат на Трамп во Белата куќа.

Околу 99 отсто од средствата на „Афинити партнерс“ им припаѓаат на инвеститори кои не се од САД, се наведува во документот. Меѓу главните финансиери се фондови поврзани со Саудиска Арабија, Обединетите Арапски Емирати и Катар.

Компанијата, која веќе го пласирала поголемиот дел од средствата, водела преговори за прибирање капитал за нов инвестициски фонд и разговарала со саудискиот „Паблик инвестмент фонд“ (Public Investment Fund) за таа можност. Сепак, во меѓувреме го променила планот и нема намера да прибира дополнителен капитал додека Кушнер волонтира во владата, изјавил главниот правен советник на фирмата. Двајца демократски законодавци минатата недела побарале дополнителни информации за бизнисите на Кушнер со инвестициски фондови од Блискиот Исток, додека истовремено учествува во преговори за надворешнополитички прашања во регионот.

Кушнер е вклучен во некои од најважните дипломатски преговори и приватни деловни аранжмани за време на вториот мандат на Трамп. Претседателот го ангажирал да посредува во мировните преговори поврзани со Украина и Иран, само неколку дена пред почетокот на бомбардирањето на Иран.

На деловен план, Кушнер се позиционирал во некои од најзначајните трансакции. „Афинити партнерс“ и саудискиот „Паблик инвестмент фонд“ постигнале договор вреден 55 милијарди долари за преземање на „Електроник артс“ (Electronic Arts). Фирмата на Кушнер била вклучена и во поддршка на непријателското преземање на „Ворнер брос“ (Warner Bros.) од „Парамаунт Скајденс“ (Paramount Skydance) во зделка вредна 108 милијарди долари, пред подоцна да се повлече од тој процес.

„Афинити“ инвестирала во повеќе од дваесет компании, со нето интерна стапка на принос од 25 отсто од основањето, според извор запознаен со ситуацијата кој побарал да остане анонимен.

Меѓу инвестициите се и „ЕГЈМ“ (EGYM), платформа за корпоративно здравје, како и „Феникс“ (Phoenix Financial) со седиште во Тел Авив. Една од попрофитабилните инвестиции е и „Кју-Екс-О“ (QXO), компанија што ја води Бред Џејкобс, автор на книгата „Како да заработите неколку милијарди долари“ (How to Make a Few Billion Dollars) и нејзиното продолжение „Како да заработите уште неколку милијарди долари“ (How to Make a Few More Billion Dollars), објавено минатата година.

Стратегијата на фирмата во голема мера се темели на инвестиции во транзиции поттикнати од геополитички ризици, се наведува во регулаторниот документ. Како банки за чување на средствата фирмата ги користела „Банк на Америка“ (Bank of America Corp.), „Фрст хорајзон банк“ (First Horizon Bank) и израелската „Мизрахи“ (Mizrahi Tefahot).