„ЏП Морган“ (JPMorgan Chase & Co.) оствари рекордна квартална добивка благодарение на тргувањето со акции, кое донесе приходи од повеќе од шест милијарди долари, како и на уделот во „Виза“ (Visa Inc.), чија вредност придонесе со 4,6 милијарди долари.
Приходите од тргување со акции во вториот квартал се зголемија за 86 отсто во однос на истиот период лани, достигнувајќи 6,03 милијарди долари, се наведува во соопштението објавено во вторникот. Тоа ја надмина и највисоката прогноза меѓу аналитичарите анкетирани од „Блумберг“ и ги зголеми вкупните приходи од тргување на 12,1 милијарди долари, повеќе од претходниот рекорд поставен во првите три месеци од годинава.
Најголемата американска банка ги објавува резултатите заедно со повеќето свои големи конкуренти. Аналитичарите очекуваат банките повторно да прикажат исклучително силен квартал во сегментот на тргување со акции, кој бележи одлични резултати поради високата нестабилност на пазарите уште од победата на американскиот претседател Доналд Трамп на изборите во 2024 година.
Нето-добивката на „ЏП Морган“ во кварталот достигна 21,2 милијарда долари, односно 7,70 долари по акција, при што речиси сите сегменти од работењето ги надминаа очекувањата. Сепак, главниот извршен директор Џејми Дајмон остана претпазлив во поглед на идните изгледи.
„Неколку ризици се движат под површината како тектонски плочи, меѓу кои геополитичките тензии и војните, тврдокорната инфлација, големите глобални буџетски дефицити и високите цени на средствата“, наведе Дајмон во соопштението. „Не можеме да предвидиме како овие фактори на крајот ќе се развијат. Можно е да останат под контрола, но исто така може да предизвикаат значителни нарушувања кога ќе се придвижат или ќе се судрат.“
„ЏП Морган“ ги ревидираше очекувањата за трошоците за целата година на околу 107,5 милијарди долари, што е над зголемувањето што Дајмон го најави на индустриска конференција во мај. Во презентацијата објавена во вторникот, банката наведува дека зголемувањето „главно се должи на повисоките трошоци поврзани со обемот на активностите и приходите, поттикнати од повисокото ниво на активности и подобрите приходи од очекуваното“. Во кварталот трошоците достигнаа 27,3 милијарди долари, повеќе од очекувањата.
Акциите на њујоршката „ЏП Морган“, кои до понеделникот пораснаа за 3,8 отсто од почетокот на годината, паднаа за 2,6 отсто во раното тргување во Њујорк.
Инвестициското банкарство е во фокусот по рекордното ИПО на „Спејс екс“ (SpaceX) во јуни. „ЏП Морган“ оствари 3,28 милијарди долари приходи од надоместоци во инвестициското банкарство во вториот квартал, што е за 30 отсто повеќе во однос на истиот период лани и над очекувањата на аналитичарите. И приходите од преземање емисии на акции и на должнички хартии од вредност ги надминаа прогнозите, при што вторите забележаа неочекувано силен раст. Надоместоците од советување при спојувања и преземања се зголемија за 20 отсто, што е помалку од растот од 27 отсто што го очекуваа аналитичарите.
Банката ја зголеми прогнозата за нето-приходите од камати за целата година на околу 105,5 милијарди долари, во споредба со 103 милијарди долари колку што раководството очекуваше во април. Во вториот квартал нето-приходите од камати достигнаа 25,5 милијарди долари, што е за 10 отсто повеќе во однос на истиот период лани. Банката исто така соопшти дека очекува стапката на отпишани ненаплатливи кредити во сегментот на кредитните картички годинава да изнесува околу 3,2 отсто, што е помалку од прогнозата од 3,4 отсто дадена во април.
Кон крајот на минатиот месец, „ЏП Морган“ ги именуваше Трој Рорбо и Даг Петно за копретседатели на банката, што претставува најнов пресврт во трката за наследник на 70-годишниот Џејми Дајмон кога ќе се повлече од функцијата. Банката соопшти дека долгогодишната директорка Мериен Лејк ќе се пензионира како дел од промените, при што Рорбо ќе ја замени на чело на големиот сектор за работење со физички лица, а Петно ќе ја преземе целосната одговорност за секторот за комерцијално и инвестициско банкарство.
.webp){kind=icon}
