Откако три помали банки едноподруго доживеаја колапс, нивните најголеми американски конкуренти бележат наплив на штедачи, кои стравуваат дека кризата ќе се прошири.
„ЏП Морган“ (JPMorgan Chase & Co.), најголемата американска банка, примила милијарди долари во последните денови, а Банката на Америка (Bank of America Corp.), „Ситигруп“ (Citigroup Inc.) и „Велс Фарго“ (Wells Fargo & Co.) исто така бележат поголем обем од вообичаеното, велат извори запознаени со ситуацијата. Претставниците на компаниите одбиле да коментираат за ситуацијата или не одговориле на испратените пораки.
Прочитајте повеќе: Колапсот на СВБ изнесе на виделина многу проблеми
„Шесте најголеми банки во САД беа и се премногу големи за да пропаднат, тоа го покажа финансиската криза пред повеќе од десет години“, вели Мајкл Имерман, доцент на бизнис-школата на Универзитетот во Калифорнија. „Значи, побезбедно е да се избере име со повисок степен на сигурност“.
Заплената на имотот на банката „Силикон валеј“ (СВБ) во петокот, што е најголем колапс на американска банка по финансиската криза, беше предизвикана од повлекувањето на штедачите, што испрати шокови низ глобалниот финансиски систем. Регулаторите презедоа акција за поддршка на депозитите во неделата, истовремено објавувајќи дека пропаднала и „Сигначур“ (Signature Bank). И двата колапса следуваа по минатонеделните вести дека згаснува „Силвергејт“ (Silvergate Capital Corp.).
Зголемен прилив на депозити бележат и преостанатите банки. „Ситизенс фајненшл“ (Citizens Financial Group Inc.) во понеделникот најави дека во изминатите неколку дена е забележан поголем интерес од потенцијални нови клиенти од вообичаено и дека привремено ќе го продолжи работното време на експозитурите за да се одговори на ситуацијата.
.webp){kind=icon}
