Швајцарски банкар се изјасни за виновен за измама затоа што им помогнал на неименуван менаџер на хеџ фонд и на други американски даночни обврзници да скријат средства во вредност од 60 милиони долари.
Даниел Волчли, кој беше член на извршниот одбор на циришкиот ИХАГ (IHAG Holding AG), кој ја поседува „Приватбанк ИХАГ“ (Privatbank IHAG), вчера се изјасни по единствената точка за заговор за измама во САД. Обвинението предвидува максимална казна од пет години затвор, но федералните обвинители на Менхетн се согласија да бараат казна од 24 до 30 месеци.
Волчли (55) беше обвинет во 2021 година заедно со двајца банкари на ИХАГ, како и со швајцарската финансиска фирма „Алајд фајнанс“ (Allied Finance Trust AG) и двајца нејзини директори. Според обвинителите, банкарите им пришле на неколку клиенти со висока нето-вредност од САД и им понудиле да ги прикријат нивните средства преку шема што ја нарекле „сингапурско решение“. Средствата на клиентите биле префрлени на сметки под други јурисдикции, а потоа вратени во Швајцарија на новоотворени сметки, кои номинално ги чувала фирма за управување со имот со седиште во Сингапур. Поголемиот дел од скриените средства што беа наведени во случајот му припаѓал на менаџер на хеџ фонд од Менхетн, идентификуван во обвинението само како Клиент-1.
Еден од другите даночни обврзници, Вејн Френклин Чин, се изјасни за виновен во федералниот суд во Сан Франциско во 2019 година за учество во шемата. Чин се согласи да врати 2,2 милиона долари.
.webp){kind=icon}
