Крстевска: Се зголемува понудата на инвестициски алтернативи и на нови видови кредити

Депозитите се основен извор на финансирање на банките, поради што, следствено, банките имаат разновидна понуда на депозитни производи, која ги има предвид различните потреби на клиентите. Во финансискиот систем во земјава постепено се зголемува и понудата на нови инвестициски алтернативи.

„Треба да имаме предвид дека финансискиот систем се развива, постепено се збогатува и се отвораат нови инвестициски алтернативи за граѓаните. Една од нив е граѓанската обврзница на државата, за која знаеме дека имаше интерес, што од своја страна ќе влијае и врз каматните стапки на депозитите на банките“, посочи главната економистка на Народната банка, Анета Крстевска, говорејќи на панел-дискусијата „Динамиката на економскиот раст и можности за штедење и инвестирање 2024“ во рамките на „Женскиот економски форум“.

МИА

Дигитализацијата може значително да го подобри пристапот до финансии и до новите инвестициски алтернативи. Дигиталната транзиција на малите и средните претпријатија, со која може да се обезбеди поголема продуктивност, може да биде поттикната од понудата на дигитални услуги од банките, но во голема мера ќе зависи и од подготвеноста за дигитализација на компаниите. Во периодот на пандемијата имаше насочување кон поголема употреба на дигиталните плаќања, како од страна на физичките, така и од страна на правните лица.

„Нашите фирми имаат 28 од вкупните 100 бода за дигитализација (просекот на е Југоисточна Европа е 31, а на Г20 од 41 до 45), од кои 13 за дигитализација на финансиските активности и 15 за дигитализација на бизнисот. Сето тоа упатува на простор за подобрување на дигитализацијата на фирмите“, истакнува Крстевска.

Организацијата за економска соработка и развој (ОЕЦД) спроведе анкета во 2022 година за финансиска писменост и дигитализацијата на микро, малите и средните претпријатија (ММСП) во Југоисточна Европа (ЈИЕ), во рамките на регионалниот проект на ИНФЕ-ОЕЦД и Министерството за финансии на Холандија.