text size
Македонските банки во првите три месеци од годинава прикажаа одлични резултати. Меѓу трите најголеми банки што делат над 60 отсто од целиот банкарски пазар, највисока добивка во првиот квартал оствари „Комерцијална банка“ АД Скопје
Во продолжение се трите графикони за добивката на банките.
„Комерцијална банка“ оствари добивка од 19 милиони евра во првиот квартал од 2024 година
„Комерцијална банка“ АД Скопје во првите три месеци од годинава оствари добивка од 1,17 милијарда денари (19,1 милиони евра), што е зголемување за 13,4 проценти во однос на истиот период во минатата година, кога добивката на банката изнесувала 1,03 милијарда денари (16,9 милиони евра). Од банката информираат дека планираната бруто-добивка за првиот квартал од годинава е остварена со 111,4 проценти.
„Притоа, остварената добивка пред исправка на вредност, која претставува показател за оперативната способност на банката да ги покрива расходите од работењето, е за 32,8 проценти поголема во однос на истиот период минатата година“, наведуваат од банката.
„Стопанска банка“ АД Скопје оствари добивка од 14 милиони евра за три месеци
„Стопанска банка“ АД Скопје во првите три месеци од годинава оствари добивка по оданочување од 861,9 милион денари (14 милиони евра), што е зголемување во однос на истиот период во минатата година, кога добивката на банката изнесувала 698,8 милиони денари (11,3 милиони евра), покажува неревидираниот неконсолидиран успех на банката објавен преку Македонската берза.
Во коментарот на остварените резултати од банката соопштија дека првиот квартал од 2024 година претставува континуитет на исклучително сериозните предизвици со кои економиите и бизнисите, како глобално така и на ниво на домашната економија, се соочија во изминатите неколку години.
„НЛБ банка“ оствари добивка од 11 милиони евра во првиот квартал од 2024 година
„НЛБ банка“ во првите три месеци од годинава оствари добивка од 678 милиони денари (11 милиони евра), што претставува намалување за 15,5 отсто во однос на остварената нето-добивка во истиот период претходната година. Од банката информираат дека намалувањето се должи на пресметани исправки на вредноста на финансиските средства и посебната резерва за вонбилансната изложеност заклучно со 31.3.2024 година.
Пласманот на вкупните кредити обезбедува раст од 7,0 отсто во овој сегмент, споредено со истиот период претходната година. И вкупните депозити споредно со истиот период претходната година бележат зголемување за 5,3 проценти.
.webp){kind=icon}
