.webp){kind=icon}
За вториот квартал од 2022 година, банките очекуваат мало нето-заострување на кредитните услови за одобрување корпоративни кредити, покажуваат резултатите од Анкетата за кредитна активност спроведена од Народната банка. Истовремено, банките очекуваат натамошно умерено нето-олеснување на кредитните услови кај кредитите на домаќинствата.
Анализирано од аспект на поединечните услови за кредитирање на претпријатијата, во првиот квартал на годината банките укажуваат дека каматната стапка и барањата за обезбедување придонесуваат за нето-заострување на кредитните услови, наспроти нето олеснувањето кај каматната стапка искажано во претходниот квартал.
Од аспект на влијанието на монетарната политика врз условите за кредитирање на корпоративниот сектор во првиот квартал од годината, околу 82 проценти од банките укажуваат дека промените на монетарната политика влијаеле незначително врз нивната каматна политика (исто како и во претходниот квартал), додека околу 3 проценти од банките укажуваат дека промените во монетарната политика влијаеле делумно врз нивната каматна политика (исто како и во претходниот квартал).
За второто тримесечје од 2022 година, банките очекуваат мало нето-зголемување на кредитната побарувачка од страна на претпријатијата.
Во однос на факторите коишто предизвикуваат промена на условите за одобрување кредити на домаќинства, конкуренцијата од другите банки и натаму е главниот фактор којшто придонесува за нето-олеснување на кредитните услови кај станбените и потрошувачките кредити.
Трошоците на финансиските средства и ограничувањата на билансот на состојба исто така придонесуваат за нето-олеснување на условите за одобрување на станбените и потрошувачките кредити, за разлика од малото нетозаострување кај станбените кредити во претходната анкета.
„За разлика од претходната анкета, каде што кредитната способност на потрошувачите главно придонесува кон непроменетост на кредитните услови кај станбените кредити и кон мало нето-олеснување кај потрошувачките кредити, во оваа анкета овој фактор придонесува кон нето заострување на условите на кредитирање кај двата типа кредити. Ризикот од неизвршување на обезбедувањето и понатаму придонесува кон нето-заострување на кредитните услови кај станбените кредити, додека кај потрошувачките кредити овој фактор бележи минимално нето-олеснување“, соопшти Народната банка.
Од аспект на влијанието на промените на монетарната политика врз каматната политика на банките при одобрувањето кредити на домаќинствата, и понатаму најголемиот дел од банките (околу 77 проценти) укажале дека промените во монетарната политика влијаеле незначително врз нивната каматна политика. Околу 23 проценти од банките укажале дека промените во монетарната политика не влијаат врз нивната каматна политика, додека минимален процент од банките укажале дека промените во монетарната политика делумно влијаат врз нивната политика.
Во вториот квартал од 2022 година, банките очекуваат нето намалување на побарувачката на кредити од страна на домаќинствата.
