„Револут“ го назначи поранешниот директор на „Сосиете женерал“ за претседател за Западна Европа

„Револут“ го назначи поранешниот извршен директор на „Сосиете женерал“ (Société Générale) Фредерик Одеа за претседател на операциите во Западна Европа, додека финтек-компанијата ги засилува напорите да ги истисне традиционалните банки од регионот.

„Немав намера повторно да се вратам во традиционална банка“, изјави Одеа за „Блумберг“ во четвртокот. Новата функција е „добра можност да се биде дел од нов потфат“ во компанија што ги има технолошките и финансиските ресурси за успех, додаде тој.

„Револут“ во последниве години бележи брз раст и минатата година опслужи повеќе клиенти од „ХСБЦ Холдингс“ (HSBC Holdings Plc.). Компанијата ја искористи и позитивната инвеститорска клима кон финтек-индустријата, па неделава нејзината вредност порасна на 75 милијарди долари по продажба на акции. На глобално ниво, „Револут“ има околу 60 милиони клиенти, а приходите минатата година пораснале за 72 отсто, достигнувајќи 3,1 милијарди фунти (4,2 милијарди долари).

Одеа раководеше со една од најголемите француски банки 15 години по финансиската криза во 2008 година, успевајќи да остане на функцијата подолго од повеќето европски банкарски директори во турбулентниот период за индустријата. Тој, исто така, го предводеше проширувањето на „Бурсобанк“ (BoursoBank), онлајн кредиторот во сопственост на „Сосиете женерал“, кој е директна цел на „Револут“ во амбицијата да ја удвои својата француска клиентска база на 10 милиони до следната година.

„‘Бурсобанк’ тогаш беше мое бебе“, изјави Одеа. Во 2018 година тој го надгледуваше и создавањето на „Сосиете женерал-Форџ“ (Société Générale-Forge), единица посветена на блокчејн и криптовалути. „Мислам дека суштински има простор за два лидера во Франција. Ние ќе имаме свој модел, со амбиција да станеме број еден банка,“ додаде Одеа.

Во мај 2023 година Одеа беше назначен за претседател на управниот одбор на „Санофи“ (Sanofi SA), нефункционерска позиција што ќе ја задржи заедно со новата улога во „Револут“. Тој е најновото звучно име што „Револут“ го привлече од „Сосиете женерал“, откако претходно ја назначи поранешната членка на одборот Беатрис Коса-Думурже за нова извршна директорка за Западна Европа.

Bloomberg

Компанијата исто така аплицира за локална банкарска лиценца, со цел да се прошири низ континентот, и планира да вработи до 200 лица во париската канцеларија како дел од инвестиција вредна 1 милијарда евра.

Понуда за хипотеки

„Блумберг“ објави претходно дека најновиот продор на „Револут“ ја поттикнал „Сосиете женерал“ да ги преиспита опциите за „Бурсобанк“ со цел да ја одбрани својата водечка пазарна позиција во земјата.

„Ќе понудиме во Европа, вклучувајќи ја и Франција, производи што ‘Бурсобанк’ нема да ги има. Исто така, целиме да понудиме хипотекарни кредити во земјата за да одговориме на специфичната побарувачка на овој пазар“, изјави Коса-Думурже во заедничко интервју со Одеа.

Коса-Думурже потврди дека финтек-компанијата моментално е во постапка за добивање банкарска лиценца од француската Служба за супервизија и резолуција (ACPR) и дека ќе понуди кредитни производи како хипотекарни заеми, како и национални штедни сметки што ќе се управуваат од Франција. Новиот париски центар ќе ги опфаќа операциите во Шпанија, Ирска, Холандија, Германија, Романија и Италија.

Француската лиценца ќе се надоврзе на постојната дозвола за банкарски услуги на ниво на Европската Унија, која „Револут“ ја има од централната банка на Литванија. Вилнус останува клучна база за европската експанзија на компанијата, со производствени линии и планови за раст што и понатаму се вкоренети во балтичкиот центар.

Барањето посебна француска банкарска лиценца се одвива додека компанијата сè уште е во т.н. „мобилизациска фаза“ за својата британска лиценца од јули 2024 година, што значи дека домашниот бизнис е под строги регулаторни ограничувања.

Во меѓувреме, компанијата минатата година обезбеди банкарска лиценца во Мексико, а во јуни соопшти дека ќе го преземе аргентинскиот „Банко Сетелем“ (Banco Cetelem), мал локален кредитор во сопственост на „БНП Парибас“ (BNP Paribas), во рамките на експанзијата во Латинска Америка. „Револут“ разгледува и планови за посилно присуство во САД, каде што ја мери можноста да аплицира за целосна банкарска лиценца или да купи постојна банка со сопствена дозвола.

„Револут“ е во завршна фаза на избор на зграда за своето седиште за Западна Европа во Париз, откако, според извршната директорка, компанијата разгледала голем број локации. Банката бара да изнајми голем објект што ќе одговара на плановите за масовно вработување во земјата, слично на новото глобално седиште во лондонскиот Канари Ворф, каде што вработените се селат овој месец.