Трамп ja тужи „ЏП Морган“ за пет милијарди долари поради прекин на банкарските услуги

Претседателот Доналд Трамп ја тужи „ЏП Морган“  (JPMorgan Chase & Co) и нејзиниот извршен директор, Џејми Дајмон, за најмалку пет милијарди долари поради обвинувања дека заемодавателот престанал да му нуди банкарски услуги нему и на неговите бизниси од политички причини.

Во тужбата, поднесена во четвртокот, банката се обвинува за трговска клевета и прекршување на имплицитниот договор за добра намера. Исто така, се тврди дека Дајмон го прекршил законот за измамнички трговски практики на Флорида. Како одговор, банката соопшти дека не затвора сметки од политички или религиозни причини.

Трамп постојано ја издвојува „ЏП Морган“ во своите напори да го искорени она што го смета за одбивање на банките да им обезбедуваат финансиски услуги на клиентите од идеолошки причини. „ЏП Морган“ ги затвори сметките за Трамп и неговите бизниси околу седум недели по нападот на американскиот Капитол на 6 јануари 2021 година од страна на неговите поддржувачи. Трамп тогаш не беше на функција и неговиот политички углед беше низок.

Тужбата ја поднесоа Трамп и неколку деловни субјекти на Трамп.

„ЏП Морган“, најголемата американска банка, ги извести тужителите, „без предупредување или провокација“ дека ги затвора сметките, предизвикувајќи значителна финансиска и репутациска штета, според тужбата поднесена во државниот суд во округот Мајами-Дејд. „Блумберг“ ја разгледа тужбата, која не можеше веднаш да се најде во судските записи.

Откако повторно ја презеде функцијата минатата година, Трамп бараше одмазда против перцепираните политички непријатели. Тој или неговата администрација презедоа мерки против адвокатски фирми, универзитети, корпорации, медиуми, демократски функционери и други кои не се согласуваат со него идеолошки.

Банката беше мотивирана од своите „разбудени“ верувања дека „треба да се дистанцира од претседателот Трамп и неговите конзервативни политички ставови“, според тужбата. „Всушност, „ЏП Морган“ ги затвораше сметките на тужителите затоа што веруваше дека политичката плима во моментот го фаворизира тоа“.

„ЏП Морган“ во соопштение наведе дека тужбата нема основа.

Регулаторни очекувања

„Затвораме сметки затоа што тие создаваат правен или регулаторен ризик за компанијата“, соопшти банката со седиште во Њујорк. „Жалиме што мораме да го сториме тоа, но честопати правилата и регулаторните очекувања нè наведуваат на тоа. Бараме и од оваа администрација и од претходните администрации да ги променат правилата и прописите што нè ставаат во оваа позиција и ги поддржуваме напорите на администрацијата да спречи банкарскиот сектор да се користи како оружје.“

Банката во ноември откри дека се соочува со прегледи, истраги и судски постапки поврзани со борбата на администрацијата на Трамп против „дебанкарството“. Одделно, oрганизацијата Трамп веќе ја тужеше „Капитал Уан Фајненшл Корп“. за слични обвинувања.

Флорида им забранува на финансиските институции да го прекинат својот банкарски однос со поединец или бизнис „врз основа на нивните политички мислења, говор или припадност“, рекоа адвокатите на Трамп во тужбата против „ЏП Морган“.

„Дебанкарството е прашање од јавен интерес и е значајно за сите потрошувачи и бизниси во Соединетите Американски Држави - а ‚ЏП Морган‘, особено со оглед на нејзината богата и водечка историја, е централен актер во оваа тековна и проблематична сага“, се вели во тужбата. Освен затворањето сметки, „ЏП Морган“ ги стави Трамп, неговата организација и членовите на семејството на „црна листа“ за сметки за управување со богатство, според тужбата.

„Не треба да бидете лишени од банкарство“, им рече Трамп на новинарите додека се наоѓаа на авионот „Ер Форс Уан“ во четвртокот. „Тоа е толку погрешно. Не знам кој би бил нивниот изговор. Можеби нивниот изговор би биле регулаторите.“

 

Трамп почна јавно да ги критикува двете најголеми банки во земјата за лишувањето од банкарство речиси веднаш штом се врати на функцијата за својот втор мандат. Пред една година, додека виртуелно се обраќаше пред публиката на Светскиот економски форум во Давос, тој за проблемот го прекори извршниот директор на „Банка на Америка“, Брајан Мојнихан - еден од малкуте директори кои беа на сцената за време на сесијата - а ги прозва и „ЏП Морган“.

Претседателот постојано го поставуваше ова прашање оттогаш. Во август, тој ги обвини „ЏП Морган“ и „Банка на Америка“ дека го одбиваат неговиот бизнис, изјавувајќи за Си-ен-би-си (CNBC) дека „ЏП Морган“ го замолила да ги затвори своите сметки, а „Банка на Америка“ го одбила неговиот обид да депонира над милијарда долари таму. Извршна наредба од 7 август им наложи на федералните регулатори, меѓу другото, да ги идентификуваат финансиските институции кои во минатото се вклучиле во незаконско „дебанкарство“.

Жалбата на Трамп ја поднесе Алехандро Брито, адвокат во „Корал Гејблс“, Флорида, кој исто така поднесе тужба против „Капитал Уан“.

Брито, исто така, поднесе тужби во име на претседателот против „Њујорк Тајмс“, „Волстрит Џурнал“ и, минатиот месец „Бритиш Броадкестин“ барајќи вкупно 35 милијарди долари за наводно клеветење на Трамп. Компаниите негираат дека сториле нешто лошо и енергично се борат против судските постапки.

— Со помош од Џош Вингроув, Ерик Ларсон, Хадријана Ло венкрон и Крис Долмеч