.webp){kind=icon}
Европа заостанува во планот на зелената транзиција, односно зајакнувањето на производството од обновливи извори на енергија, бидејќи се зголемуваат трошоците за развој на вакви проекти, објави данската компанија Вестас, која е најголем светски производител на ветерни турбини.
„Чистата енергија треба да се развива како „луда“ за да се исполнат целите на Европската унија (ЕУ). Цените на електричната енергија сега се толку високи што зголемените трошоци за изградба на обновливи централи не треба да ги забават проектите“, рече извршниот директор на Вестас, Хенрик Андерсен, во интервју на економскиот состанок во Давос.
Вестас е меѓу производителите кои ги зголемија цените поради зголемените цени на суровините и проблемите во синџирите на снабдување кои ја нарушија индустријата во последните две години.
Но, проблемот со поскапувањето на производителите не се чувствува само во енергијата на ветерот, туку и во зелениот водород, кој може да се користи наместо природен гас и исто така е многу важен сегмент за оддалечување од фосилните горива.
САД се во предност во однос на даночните стимулации пред Европа, каде што субвенциите се помали и покрај силната амбиција за зелената транзиција.
Многу производители на електрична енергија од обновливи извори остварија големи профити поради растот на цените, што доведе до посебно оданочување на дел од приходот.
Андерсен вели дека разликата помеѓу трошоците за производство на енергија и пазарната цена е таква што инвеститорите би можеле да платат повисоки трошоци за набавка на опремата.
Тој додаде дека Вестас била „дисциплинирана“ за цените на турбините и покрај падот на нарачките.
„Некако лудо е кога ќе видите дека решенијата што ги нудите никогаш не биле толку вредни, а сепак губиме пари“, вели Андерсен.
