.webp){kind=icon}
Од увозник на електрична енергија земјава преку зелената енергетска транзиција, поттикната од енергетската криза која придонесе за зголемување на инсталираниот капацитет за повеќе од 30 проценти во изминативе години, полека но сигурно се движи во насока да стане извозник, вели претседателот на Регулаторната комисија за енергетика Марко Бислимоски.
„Од 1 јануари 2022 година до сега има издадено преку 600 лиценци за производство на електрична енергија од кои 99 отсто се за фотоволтаици со што новоинсталираниот капацитет изнесува 420 мегавати, а до крајот на годинава се очекува да достигне до 600 мегавати“ информира Бислимоски.
Новоинсталираните 420 мегавати, се еквивалент на две термоелектрани Неготино. Институциите во државата со тоа покажале дека се способни да овозможат изградба на нови 600 мегавати производни капацитети за само две години.
МИА
„Се разбира дека производството на електрична енергија од фотоволтаици на годишно ниво е пониско во споредба со некоја термоелектрана, но фотоволтаиците помагаат да се намали увозната зависност на земјава. Во првите седум месеци од годинава увозот на електрична енергија, кој во зависност од година изнесувал од 30 до 40 проценти, е сведен на 14,5 проценти со што се стабилизира и ситуацијата со одлив на средства од државата“, порача Бислимоски.
Со новото нормално и со случувањата на берзите на електрична енергија има сосема спротивна ситуација од тоа што го имало пред две до три години.
„Сега цената на електричната енергија во текот на денот во периодот од 10:00 до 17:00, па и до 18:00 часот е најниска и е многу пониска од таа што е во 18:00, 19:00 часот. Сето тоа ни даде за право повторно да ја вратиме дневната евтина тарифа. Со тоа даваме сигнал и до ЕСМ и ЕВН Хоум набавки на електрична енергија да се прават во периодот кога цената на електричната енергија на берзите е најниска“, вели Бислимоски.
ЕБОР
На ред е државата која треба да направи една поголема гасна електрана и да го реализира проектот за Чебрен и Галиште, бидејќи тоа ќе ни треба за балансирање на системот. Тоа што може да го направи државата сама или со јавно-приватно партнерство треба да се направи, порачува Бислимоски.
“Треба да се реализираат и најавениот голем фотоволтаик во Штип од околу 400 мегавати, како и најавената ветерна електрана во Кривопаланечко од 400 мегавати и поголемата когенеративна постројка во Скопје, која е грчка инвестиција, со што Македонија од земја увозник ќе ја направат земја извозник на електрична енергија“, вели Бислимоски.
Посочи дека енергетската криза помогнала на површина да излезат сите пропусти кои се правеле во изминатите 30-тина години. Нема развој на економија без добра енергетска политика и добра енергетска стратегија кои се прават за да се изградат производни капацитети, да се шири мрежата, да се направи диверзификација на изворите на природен гас, односно државата да биде поинтересна и поконкурентна кога меѓу другото ќе бара и странски инвестиции, порачува Бислимоски.
