Дваесет и пет години подоцна: Купувај македонско – но што?

Ако сите мајки им купуваат на своите деца млекце и чоколадо со сонценце, тогаш ние ќе имаме доволно пари. Вака накратко гласи содржината на рекламата за кампањата „За наше добро! Купувајте македонски производи“ од пред 25 години.

Кампањата а промовираше Никола Груевски, тогашен министер за трговија, а подоцна и премиер. Целта на кампањата беше да се стимулираат граѓаните да купуваат домашни производи за да се зголеми домашното производство – и „да имаме доволно пари“, како што зборуваше девојчето со црвено капче во рекламата додека ја облекуваше својата кукла.

Сега, Владата повторно зборува за слична кампања - „Купувај домашни земјоделски производи“. Целта е иста – да се стимулира растот на домашната економија и директно да се влијае на зголемување на потрошувачката на земјоделските производи што ги произведуваат македонските земјоделци.

Во владиното соопштение се наведува дека граѓаните ќе можат да купуваат домашни земјоделски производи во маркетите, а секој производ што е произведен во Македонија или е увезен од надвор ќе биде посебно обележан.

Увозот на храна лани надмина милијарда евра

Лани за првпат увозот на храна во земјава надмина милијарда евра. Според статистичките податоци, во земјава во 2024 година влегле 785 илјади тони храна, во вредност од милијарда и 67 милиони евра. Вредноста на увозот бележи раст од 9,3 отсто во однос на 2023 година, а количествата се зголемиле за 6,5 отсто.

Домашната индустрија, пак, лани извезувала повеќе во однос на 2023 година. Извозот изнесувал 545 милиони евра или 10,6 отсто повеќе од 2023 година, а извезени биле 480 илјади тони храна или 11,7 отсто повеќе на годишно ниво. Бројките покажуваат дека иако извозот од земјава расте, увозот е двојно поголем.

Според анализите, за десет години количински увозот на храна во земјава не бележи силен раст, но вредноста на увезената храна е за 90 отсто поголема.

Правилно насочување на субвенциите

Петтина од извезената храна од земјава е од конзервата индустрија. Компанијата „Кривогаштани промет“ близу три децении извезува конзервирани производи во над 20 земји. Сопственикот Горан Цуцулоски во разговор за „Блумберг Адрија“ вели дека нивна главна суровина е пиперката, која во земјава ја има доволно, но евидентно е дека државата троши многу пари за увоз на храна. Со добра стратегија, преку зголемување на субвенциите за градинарските производи, производството на храна ќе се зголеми, а цените ќе станат поконкурентни.

„Тутунската индустрија лани извезе производи во вредност од 126 милиони евра, а државата преку субвенции во секторот учествуваше со 30 милиони евра. Конзервната индустрија лани острови извоз во вредност од 106 милиони евра, а субвенциите за градинарско производство изнесуваа нешто над три милиони евра. Доколку се зголемат субвенциите за градинарите, ќе имаме повеќе суровина, поконкурентни цени и позадоволни градинари, а државата ќе остварува и поголем девизен прилив од извезените производи“, вели Цуцулоски.

Статистиката годинава бележи раст

Неодамна Министерството за земјоделство даде отчет за сработеното во првата година од мандатот. Оттаму се пофалија со раст на откупот и продажбата на земјоделските производи, но исто така и со раст на извозот на земјоделските производи за пет отсто во првиот квартал годинава споредено со лани.

Во делот на производството на јаболко, Министерството соопшти дека околу 13.000 тони македонско јаболко е извезено во првите два месеца годинава или 82 отсто повеќе од истиот период лани, односно во вредност извозот се зголемил од два на пет милиони евра.

„Во однос на пролетната зелка имавме одлична цена во делот на пласманот, што одамна се нема случено во Струмичкиот Регион. Цената на пролетната зелка не падна под 35 денари, додека просекот на цената на откупената зелка од целата реколта изнесуваше 43 денари за килограм. За оваа реколта се очекува некаде околу 40.000 тони род. Во Струмичкиот Регион влегоа околу 30 милиони евра од извозот на само една градинарска култура“, се наведува во отчетот на министерот за земјоделство.

За четири месеци годинава увозот е за 200 милиони евра поголем од извозот

Забрзува извозот на градинарски производи, но не се намалува увозот на храна. За увоз на двата производа од рекламата од почетокот на текстот, млеко и чоколадо, за четири месеци од годинава, според податоците на Државниот завод за статистика, се одлеале 25 милиони евра. За млеко 6,7 милиони и за чоколади над 18 милиони евра.

Вкупно, од почетокот на годината до април увозот забрзал. Увезена е храна со вредност од над 370 милиони евра, а извозот вреди 183 милиони евра.

Прехранбената индустрија од почетокот на годинава првпат во мај забележа раст. На годишно ниво тој изнесува 10,2 отсто. За периодот од јануари до мај годинава секторот пораснал само за 1,2 отсто поради лошите резултати од првите четири месеци од 2025 година. 

Во моментов нема коментари за веста. Биди прв да коментира...

Остави коментар