Со 100.000 евра поддршка, Владата ќе ги враќа младите брачни парови во село

Владата ќе ги стимулира младите што ги напуштиле селата да се вратат дома. Притоа ќе им понуди и финансиска поддршка од 100.000 евра. Идејата не е нова. Пред десетина години сличен проект имаше тогашниот премиер Никола Груевски, но сега финансирањето на тие што ќе се вратат во село влегува во закон.

Новиот закон за земјоделство и рурален развој е достапен за јавен увид. Увидот ќе трае до 28 мај, а на 2 јуни е предвидено да се одржи јавна расправа.

Новиот закон треба да обезбеди усогласување со европските директиви во делот на директните плаќања и уредувањето на земјоделските пазари. Главната цел на законот е заживување на руралните средини и стимулирање на земјоделците да се здружуваат за да станат поконкурентни.

За што сè може да се добие поддршка од 100.000 евра?

Поддршката за враќање во родните села ќе важи за младите брачни парови. Парите ќе ги добијат за да можат да инвестираат во изградба или реконструкција на објекти, купување земјоделска механизација, земјоделско земјиште и набавка на добиток.

Членот 138 предвидува корисниците на оваа поддршка да не се постари од 40 години.

„Финансиската поддршка изнесува 80 отсто од вредноста на прифатливи и направени трошоци, најмногу до 6.000.000 денари по брачен пар. Периодот на користење на поддршката е проектен циклус во траење од три последователни години“, стои во новиот закон.

Услов да дојдат до парите е младите што ќе се вратат во селата да се занимаваат со земјоделство во наредните 10 години, во спротивно доделената поддршка ќе треба да ја вратат во целост.

Со членот 140 од законот се предвидуваат исто така 100.000 евра за младите до 40 години што ќе основаат бизниси во селата поврзани со земјоделството.

Повеќе пари за осигурување од непогоди

Со оглед на зачестеноста на природните непогодни и штетите што ги трпат земјоделците поради климатските промени, Владата прави нов обид да ги стимулира да се осигуруваат. Наместо 60 отсто, сега ќе бидат покриени до 70 отсто од трошоците за осигурување.

„Поддршката се доделува во форма на надомест на дел од трошоците за осигурување на земјоделското производство. Висината на поддршката може да биде во висина до 70 отсто од висината на премијата за осигурување, но не повеќе од 200.000 денари по корисник“, се наведува во предлог-законот.

Depositphotos

Окрупнување на посевите

Освен заживување на селата преку стимулирање на младите да се вратат, новиот закон превидува и поддршка за промовирање нови форми на соработка. Ако барем два субјекта почнат нова активност, имаат право на поддршка.

„Поддршката може да се додели како вкупен износ што ги покрива трошоците за соработка и трошоците за реализирани проекти и активности или може да ги покрие само трошоците за соработка со употреба на средства од други видови на интервенции, национални или ЕУ-инструменти за спроведување на проектот.

Поддршката се доделува најмногу до седум години и покрива 70 отсто од прифатливите трошоци, се наведува во законот.

Субвенции за камати и банкарски гаранции

Во делот на законот што се однесува на државната помош, се преведуваат повеќе мерки за стимулирање на инвестициите во руралните средини. Една од тие мерки е субвенционираната камата.

Овој вид на помош ќе се однесува на кредити што имаат годишна каматна стапка во висина до 8 отсто на годишно ниво, за период до 10 години, кои не се повисоки од 500.000 евра.

Помошта е во висина од 50 отсто од висината на каматната стапка на годишно ниво.

За полесен пристап до кредити, државата ќе обезбеди и кофинансирање на банкарските гаранции за кредитите наменети за земјоделство и рурален развој како примарно земјоделско производство, преработка на земјоделски производи и трговија на земјоделски производи.

Помош за набавка на гориво и интервентен фонд

И таканаречената зелена нафта влегува во закон. Земјоделците ќе имаат право на помош во висина до 100 отсто од трошоците за набавка на гориво за земјоделската механизацијата, но не повеќе од 100.000 денари по стопанство. За оваа намена земјоделците ќе добијат картички.

Законот предвидува интервентен фонд за земјоделството за ублажување на последиците од нарушување на пазарот поради ниски откупни цени на производите или зголемување на трошоците на производство.

Законот предвидува и помош за заштита на земјоделско земјиште преку анализа на физичките и хемиските својства на почвата. Висината на помошта може да изнесува до 100 отсто од настанатите трошоци за анализа на физичките и хемиските својства на почвата.

Во моментов нема коментари за веста. Биди прв да коментира...

Остави коментар