Трошоците за производство поскапеле за два отсто, а земјоделските производи за 20 отсто

Во декември цените на сите влезни трошоци за производство во земјоделството се зголемиле за 2,4 отсто на годишно ниво, покажуваат податоците од Државниот завод за статистика. Наспроти тоа, растот на цените кај аутпутот во земјоделството е десет пати поголем, односно цените на крајните производи за период од една година се зголемиле за 20,3 проценти.

„Блумберг Адрија“ веќе пишуваше за тоа дека во случајот со земјоделството, родот е тој што ги поматува сметките. Имено, помалиот принос е клучна причина зошто крајните цени на земјоделските производи се зголемуваат значително повеќе отколку што растат трошоците. На тоа се додава и зголемената дневница за работна рака, па сето тоа на крајот доведува до толку голем раст на цените на земјоделските производи.

 

 

Според статистичките податоци за трошоците во земјоделското производство, поевтинување во декември лани во однос на истиот месец претходната година има единствено кај семињата, кои поевтиниле за 7,7 проценти, и кај минералните ѓубрива, чија цена е пониска за 7,8 отсто. Сите други инпути поскапеле во последната година. Најизразено е поскапувањето на ветеринарните услуги, од дури 18,3 проценти. Следуваат трошоците за транспортна опрема, кои се зголемени за 8,3 отсто, машините и опремата се поскапи за 6,7 проценти, а одржувањето на опремата за 5,7 отсто.

 

 

Кога станува збор за аутпутот во земјоделството, статистиката пресмета поскапување кај растителното производство од 23,3 проценти, а кај добиточното производство 11,9 отсто. Од сите ставки, на годишно ниво цените се намалени единствено на житата и на оризот, и тоа за 7,5 отсто. Сите други земјоделски производи имаат повисоки цени, и тоа најмногу зеленчукот, кој поскапел дури за 64 отсто. Индустриските растенија и вината имаат повисоки цени за околу 15 проценти, компирите и добиточните растенија се поскапи за околу шест проценти, а овошјето и грозјето за 5,3 отсто.