Ретките метали, фентанилот и сојата се главни прашања помеѓу САД и Кина, според американскиот претседател Трамп. Тој ги наведе клучните точки во преговорите непосредно пред враќањето на преговарачката маса. „Не сакам да си играат со нас кога станува збор за ретките метали“, изјави Трамп. Неколку дена порано, американскиот претседател се закани со царина од 100 отсто на кинеските пратки, откако Пекинг најави воведување опсежни контроли врз овие елементи.
Добро утро, ова се останатите пет вести што се важни за почеток на денот.
ВИ ќе ја зголеми потребата за бакар - ќе стигне ли цената до 12.000 долари за тон
Во мај лани цената на бакарот за прв пат надмина 11.000 долари за тон, потоа се стабилизираше и од почетокот на трговската војна на американскиот претседател Трамп годинава, повторно има нагорен тренд. Неделава ја почна со раст од еден отсто и вчера се тргуваше по цена повисока од 10.700 долари за тон. Во услови на раст на побарувачката на металот, а сè поголем недостиг за металот на пазарот не е исклучена можноста да се остварат проекциите и цената да надмине 12.000 долари за тон.
„Иако не е благороден метал како златото или среброто, туку индустриски, мислам дека бакарот е клучен метал во светот на вештачката интелигенција и дата-центрите. Се очекува побарувачката за бакар нагло да порасне во текот на следната деценија, делумно поттикната од растот на вештачката интелигенција и зголемената европска потрошувачка за одбрана“, вели аналитичарот на „Блумберг Адрија“ Матеј Вујаниќ.
Пониска плата за тие што работат оддома? Македонците и Европејците не прифаќаат
Поминаа неколку години откако пандемијата ги прошири видиците и овозможи работата да се одвива и од далечина, секако, таму каде што е можно. Иако на тоа прво се гледаше со недоверба, искуството во годините потоа во најголем број случаи го докажа спротивното – дека манипулациите од страна на работниците се изретчија, продуктивноста остана иста или некаде дури и се зголеми, а трошоците на компаниите се намалија. Учинокот? Вин-вин или двојна победа.
Од една страна има задоволни работници, кои успешно го комбинираат животниот ритам со работата и чиј труд се вреднува според постигнатото, а не според присуството. Од друга страна, работодавците добиваат ист или подобар учинок од своите вработени во услови на помали трошоци за канцелариско работење и, што е уште поважно, среќни и мотивирани работници што се идентификуваат со компанијата, а тоа се отсликува и преку нивната лојалност и посветеност на работата.
Рекордни плати и договори - започнува новата НБА сезона
Новата, 80-та НБА сезона започнува вечерва, а актуелните шампиони Оклахома Сити Тандер ќе ја отворат со натпревар против Хјустон Рокетс. Од финансиска страна, најважната вест е дека ќе стапи на сила рекорден медиумски договор вреден дури 76 милијарди долари, што соодветно ќе ги зголеми платите на играчите, ама и цените на билетите.
Од натпреварувачка перспектива, сè е исто како и минатата година - триесет тима поделени во две конференции ќе се борат за место во плејофот во текот на 82 натпревари, а само една екипа на крајот ќе го подигне престижниот трофеј од Лари О'Брајан.
За Кина економската цел останува достижна и покрај најслабиот раст годинава
Кина соопшти дека економијата сè уште е на пат да ја достигне годишната цел за раст, и покрај најслабиот квартален резултат во изминатата година, при што силниот извоз ја амортизира пошироката забавеност.
Бруто-домашниот производ пораснал за 4,8 отсто во третиот квартал во однос на истиот период лани, што е малку над очекувањата на економистите. Според Националното биро за статистика, растот во првите девет месеци поставил „цврста основа“ за остварување на целта за годишен раст од околу 5 отсто.
„Керинг“ му го продава козметичкиот сектор на „Лореал“ за 4,7 милијарди долари
„Керинг“ (Kering SA) се согласи да му го продаде својот козметички сектор на „Лореал“ (L’Oreal SA) како дел од долгорочен стратешки сојуз, при што извршниот директор Лука де Мео има цел да ја обнови успешноста на францускиот луксузен гигант.
Компанијата, која е сопственик на модни брендови, меѓу кои и „Гучи“ (Gucci), соопшти дека зделката има цел да го забрза растот. Вредноста на зделката изнесува 4 милијарди евра (4,7 милијарди долари), сe наведува во соопштението на двете компании објавено синоќа.
.webp){kind=icon}
