Речиси 30.000 македонски земјоделци „исчезнаа“ за шест години

Бројот на невработени во Македонија минатата година првпат падна под границата од 100.000 лица, меѓутоа статистичките податоци откриваат дека лани имало само мал пораст на бројот на вработени. Всушност, во претходниот период од 2019 до 2023 година има континуирано опаѓање на бројот на вработени лица.

Нашата анализа покажа дека најизразено намалување на бројот на вработени има во земјоделството. Бројот на вработени во секторот „земјоделство, шумарство и рибарство“ во 2019 година изнесувал 91.434 лица, а на крајот на минатата година тој паднал на 62.287 лица. Математиката покажува дека за шест години бројот на вработени во овој сектор се намалил за 29.147 лица.

Забележително е дека во овој шестгодишен период има намалување на бројот на вработени и во преработувачката индустрија, снабдувањето со струја, гас, пареа и климатизација и кај повеќе други дејности. Од друга страна, забележливо зголемување има на бројот на вработени во секторот „информации и комуникации“, во финансиското посредување и во јавната управа и одбрана.

         

Иселувања

Иселувањето е една од главните причини за намалувањето на работната сила во земјава, а токму земјоделството е сектор за кој постои најмал интерес меѓу младите лица. „Блумберг Адрија“ веќе пишуваше дека голем дел наши сонародници ја избираат Германија како ветена земја за вработување и подобар животен стандард. Имено, вкупниот број македонски државјани регистрирани како странци што живеат во Германија заклучно со декември минатата година изнесувал 156.845 лица, што е двојно повеќе отколку пред десет години, кога во оваа земја имало околу 77.000 лица од Македонија, покажуваат податоците на германскиот Федерален завод за статистика.  Само во изминативе пет години (од 2019 до 2023 година) бројот на македонски граѓани евидентирани како странци во Германија се зголемил за повеќе од 41.000 лица.

Растат субвенциите, ама и увозот на храна

Во време кога инфлацијата континуирано уриваше рекорди, скапо нѐ чини тоа што опаѓа интересот за земјоделството во Македонија. Веќе пишувавме дека за период од десет години увозот на земјоделско-прехранбени производи во Македонија е зголемен трипати. Негативниот биланс во 2014 година изнесувал околу 150 милиони евра, во 2023 година надминал 430 милиони евра. На крајот на минатата година беше извршена среднорочна процена на остварувањата во сите потсектори во земјоделството за период од десет години.

Драги Димитриевски, професор на Факултетот за земјоделски науки и храна, кој работеше на процената, во изјава за „Блумберг Адрија“ рече дека дошле до заклучок дека, и покрај растот на поддршката, производството се намалува.

„За жал, добивме резултати што кога ги вкрстивме со трендовите на буџетските поддршки (субвенциите), се покажа дека и покрај зголемувањето на субвенциите, производствените капацитети (обработливо земјоделско земјиште и број на добиток) се намалени, што доведува и до намалување на производството. Единствени потсектори во кои има мало зголемување или задржување на состојбата се овоштарството и свињарството. Особено се поразителни податоците за сточарските потсектори (освен кај свињарството). На пример во говедарството бројот на говедата се намалил за околу 100 илјади или во просек по 10 илјади грла годишно“, вели тој.

Димитриевски смета дека ако се зголеми поддршката во руралниот развој за сметка на директните плаќања кон земјоделците, во облик на сегашните земјоделски субвенции, може да се очекува и зголемување на производството на храна.

„За жал, најголемиот дел од средствата во досегашниот период одеше за субвенции, и тоа и повеќе од 90 отсто. Нашите определби, но и стратегиските цели се поставени така што субвенциите треба да заземат 65 отсто, а преостанатите 35 отсто да одат за програмата за рурален развој. На тој начин ќе се подобруваат и условите за живот во руралните средини и ќе се овозможи запирање на процесот на депопулација на овие средини, а особено на младите, за кои оваа програма предвидува повеќе мерки за нивна поддршка“, вели Димитриевски.

 

Во моментов нема коментари за веста. Биди прв да коментира...

Остави коментар