Државата, за жал, не го следи трендот на дигитализација што одамна го наметнува приватниот сектор, смета министерот за дигитална трансформација. Според него, фокусот мора да се стави на вештачката интелигенција (ВИ) и нејзиното имплементирање како во фирмите така и во државните институции.
„Често критикуваме за тоа што го правеле владите и државната администрација во минатото во однос на приватниот сектор. Македонија долго има свесност за дигитализацијата, со први е-комерц платформи уште од 2010 година, кога регионот не ни помислуваше за тоа. За жал, државата престана да го следи трендот што го наметнуваше приватниот сектор, иако некои од компаниите уште наметнуваат стандарди. Затоа сметам дека е стратешко формирањето вакво министерство, со цел да се врати фокусот“, рече министерот за дигитална трансформација Стефан Андоновски во рамките на своето излагање на конференцијата на „Блумберг Адрија“, насловена „Потрошувачки трендови“. Тој смета дека не е неопходно долго да се одржува таквото министерство, туку кога ќе се постават фундаментите и ќе се фати чекор со трендовите, тоа да се префрли како работна задача на соодветна агенција, без да постои такво министерство во иднина.
Блумберг Адрија
Клучни проблеми и/или предизвици со кои се соочува државата во моментот во однос на дигитализацијата, според Андоновски, се човечкиот фактор и политичката желба да се променат состојбите.
Кои технологии ќе го обликуваат општеството?
„Дефинитивно ВИ“, вели Андоновски, посочувајќи дека таа ќе го обликува начинот на живеење во сите области, а со тоа, секако, и купувањето и потрошувачките навики, и тоа во сите сегменти. Тој смета дека ВИ нема да го замени човекот, но тие што ја разбираат ќе бидат во предност, а ВИ ќе ги замени сите што не ја разбираат, и тоа секаде, и во државниот и во приватниот сектор.
„Се надевам има свесност за тоа кај сите чинители и ќе се наметне како потреба инвестицијата во ВИ, која не е многу голема а придобивките се огромни“, вели Андоновски.
Блумберг Адрија
Во таа насока државата прави и неколку радикални чекори, вели Андоновски, меѓу кои и укинувањето на Фондот за иновации и технолошки развој, бидејќи смета дека многу малку компании аплицирале на последните јавни повици зашто биле свесни дека вистинската иновација не добивала пари од државата.
„Втора работа е што во соработка со Сојузот на стопански комори и ФЕИТ формираме прв европски дигитален иновациски хаб, што на сите мали и средни претпријатија треба да им помогне со обуки и планови за дигитализација, кои се бесплатни за нив“, вели Андоновски.
Интернет-измамите и натаму се проблем број еден
Измамите на интернет се најголем проблем или предизвик, смета Андоновски. „Мислам дека сите е-трговци ја работат работата како што треба, но имаме проблем со измами и нелегални приредувачи на игри на среќа на интернет, кои се дигитално подготвени да ги лажат луѓето. За жал, тука може само превентивно да се дејствува, ретко може репресивно, бидејќи не се стигнува до коренот на проблемот“, вели Андоновски, напоменувајќи дека зголемувањето на дигиталната писменост, особено кај повозрасните генерации, е особено значајно.
Блумберг Адрија
Фокусот, според Андоновски, мора да биде на човечките ресурси. „Тоа не бара премногу инвестиции. Ние немаме премногу човечки ресурси, немаме голема квадратура или минерални ресурси, но имаме мозок и произведуваме одличен кадар, особено во техничките науки. Тука треба да биде фокусот, бидејќи тие треба да ја движат иднината. А во овој аспект не мора да чекаме со години. Ако инвестираме паметно, сигурно бргу ќе имаме резултати“, рече Андоновски.
.webp){kind=icon}
Во моментов нема коментари за веста. Биди прв да коментира...