Високите цени не се проблем - забрзува продажбата на станови

Забрзаниот раст на цените на становите не ги колеба купувачите. Во првите три месеци од годинава се продадени 160 стана повеќе споредено со лани, а вредноста на продадените станови е за над 37 милиони евра поголема од првиот квартал минатата година.

Според податоците од кварталниот извештај на Агенцијата за катастар, заклучно со март биле продадени вкупно 1.947 стана. За нив биле потрошени 137 милиони евра. Во истиот период лани биле направени вкупно 1.787 трансакции вредни нешто над 100 милиони евра.

Во анализираниот период, од јануари до март годинава, Народната банка на Македонија регистрира значителен раст на цената на становите од 19,4 отсто, што е највисоко ниво во последните две години.

Во услови на забрзан раст и на побарувачката и на цените, минатата година, како што веќе пишуваше „Блумберг Адрија“, во секторот недвижности во земјава за првпат се свртеа над милијарда евра.

Колку официјално чини квадратен метар во Скопје?

Податокот за промената на цената на становите на квартално ниво што го објавува НБРМ се однесува само за територијата на Скопје, а индексот е подготвен врз основа на податоци што се однесуваат на огласите за продажба објавени од агенциите што се занимаваат со промет со недвижности.

На сличен начин функционира и порталот „Цени квадрат“. Според овој извор, деновиве најскапите станови се продаваат во скопски Центар, каде што просечната цена изнесува 2.100 евра за квадратен метар. Во Карпош просечната цена изнесува над 1.900 евра за квадрат.

ценаквадрат.мк

Официјален податок за вредноста на квадратен метар во земјава не постои. Поранешниот регистар на цени и закупи, кој го водеше Агенцијата за катастар, не е ажуриран од 2020 година, а во кварталните извештаи се објавува само вкупната вредност на сите трансакции.

Висок раст на просечната вредност на становите

Во согласност со податоците што ги објавува Катастарот може да се утврди дека забрзано расте просечната вредност на становите во земјава. Имено, ако лани во првиот квартал просечната вредност на еден стан изнесувала 56.000 евра, годинава во периодот јануари-март таа изнесувала 70.000 евра.

Според пресметките на специјализираната веб-страница „Глобал проперти гајд“ (globalpropertyguide.com), просечната вредност на квадратен метар во земјава изнесува 1.170 евра и за стан од 100 квадрати треба да се издвојат 115.387 евра. Истата квадратура пред седум години чинела 76,058.

Сепак, цените варираат. Па така, просечната вредност на трисобен стан во Скопје, според „Глобал проперти гајд“, изнесува 118.638 евра, а во Центар достигнува 224.275 евра.

Во Охрид за истиот простор треба да се издвојат, во просек, 82.884 евра. „Глобал проперти гајд“ наведува дека во внатрешноста на земјата цените на становите се за 25 отсто пониски од националниот просек.

Растат хипотеките

Во периодот јануари-март 2025 година, според евиденцијата на Агенцијата, се запишани товари врз недвижностите во вкупен број од 2.596, со вкупна вредност од 384.969.557 евра. Во истиот период лани биле запишани хипотеки врз 1.953 недвижности, а вредноста изнесувала 326.659.594 евра. Над половина од хипотеките се запишани во скопскиот катастар.

И извештаите на НБРМ покажуваат раст на станбеното кредитирање. Заклучно со април годинава растот на станбените кредити на годишно ниво изнесува 14 отсто. До април како станбени кредити банките имаат пласирано над 1,6 милијарда евра.

Во моментов нема коментари за веста. Биди прв да коментира...

Остави коментар