Продажбата на станови падна за 14 отсто, најскапиот стан продаден за 200.000 евра

Најскапиот стан во третото тромесечје од оваа година е продаден во скопски Центар. Инвеститорот го продал за близу 200.000 евра. Станот е со површна од 63 квадрати , а еден квадрат чини 3.159 евра.

Во истиот период во скопската општина Карпош стан од само 41 квадрат е продаден за 128.000 евра или 3.122 евра за еден метар квадратен, покажуваат податоците од извештајот на третиот квартал од 2026 година од Агенцијата за катастар. 

Извештајот исто така покажува дека за периодот од 1 јули до 30 септември 2026 година, пазарот на недвижности и понатаму бележи значителна економска активност, но со намалена динамика на купопродажбите.

„Во третиот квартал се регистрирани 7.679 трансакции, што претставува намалување од 8,2 отсто во споредба со претходниот квартал. Вкупната финансиска вредност на пазарот изнесува 339 милиони евра, од кои 337,8 милиони евра се однесуваат на купопродажби“, стои во извештајот.

Според Катастарот, особено интересни се движењата на пазарот на станови. Бројот на продадени станови е намален за 14 отсто, додека бројот на закупени станови бележи раст од 45 отсто. Истовремено, вкупната месечна закупнина е зголемена за 31 отсто во споредба со претходниот квартал.