Вишок станови, дефицит на вештини - пет вести на денот

Манчестер Сити, со финансиската поддршка од Абу Даби, можеше да го забрза речиси секој дел од својот развој, да доведе подобри играчи, да ангажира врвни тренери и да изгради инфраструктура. 

Финансиските правила поставија граница на таа амбиција. Богатството на сопствениците мораше да добие соодветно место во клупските сметки, а трошењето да остане во рамките на пропишаните лимити. Според наодите на независната комисија на Премиер лигата, Сити со години ги „штелувал“ извештаите за работењето на потребите на својот спортски проект.

Три забранети модели објаснуваат како функционирал тој систем.

Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.

Двоцифрен пад на продажбата на нови станови ама цените и натаму растат

Цените на становите во Македонија растат со темпо што тешко може да се спореди со поголемиот дел од Европа, но купувачите веќе не го следат тој раст со истата сила. Новите податоци на Народната банка откриваат своевиден пресврт на пазарот со оглед на тоа што лани има значителен пад на продадени новозавршени станови. 

Сепак, тоа не ги спречува градежниците со поддршка на банките да продолжуваат да ја зголемуваат понудата иако проценетото време потребно за продажба на новите станови се пролонгирало од 6 години во 2024 година на 7,9 години во 2025 година. Доаѓа ли до заситеност на македонскиот пазар на недвижности?

Како УКИМ ги подготвува студентите за работници на иднината?

„Руби сауер“ (Ruby Sour), „грин теори“ (Green Theory) и „маунтајн нектар“ (Mountain Nectar) се три крафт пива во чиј развој учествувале студенти на Технолошко-металуршкиот факултет при УКИМ, заедно со професорите и технолозите од „Пивара Скопје“. Зад имињата стојат рецептура, производствен процес, лабораториски анализи и оценување на готовиот производ. За студентите, тоа било можност знаењето од предавањата да го применат во нешто што може да се произведе, провери и дегустира.

„Преку овој проект студентите ги применија своите теоретски знаења во реален производствен процес, од развојот и подготовката на пивото, преку запознавањето со современите технологии и лабораториските анализи, до сензорската евалуација на готовите производи“, вели за „Блумберг Адрија“ деканот на Технолошко-металуршкиот факултет (ТМФ), проф. Игор Јорданов.

Токму таква подготовка бараат и компаниите: знаење што дипломецот ќе може да го употреби на работното место. Но меѓу студентската клупа и првата работа, според работодавците, често недостигаат практично искуство, работа со современа технологија и способност за решавање реални проблеми.

„Енвидија“ на чекор до рекордна вредност од шест билиони долари

„Енвидија“ е на чекор да стане првата компанија чија пазарна вредност ќе достигне шест билиони долари, додека инвеститорите повторно се вртат кон производителот на чипови за вештачка интелигенција (ВИ).

Акциите повторно се на рекордно високо ниво откако компанијата изнесе силни прогнози за приходите и го најави најголемиот откуп на сопствени акции во историјата, користејќи ја предноста од процената на вредноста која е близу до повеќегодишен минимум. Тие два фактора - силниот раст и релативно ниската вредност - особено доаѓаат до израз во момент кога инвеститорите се соочуваат со високи каматни стапки и послаби економски показатели.

Акциите годинава пораснаа за 28 отсто, а тој раст ја зголеми пазарната капитализација на „Енвидија“ за 1,2 билиони долари, на нешто помалку од 5,8 билиони долари. Компанијата воедно далеку најмногу придонесе за растот на индексот S&P 500, кој годинава порасна за 14 отсто.

Кој во роботиката веќе заработува, а кој ветува раст - акции и ЕТФ-ови кои треба да следат

Вештачката интелигенција (ВИ) им отвора пат на роботите кон работни места кои досега беа премногу сложени за автоматизација, а инвеститорите имаат горливо прашање - кој ќе заработи најмногу пари од тоа. Консултантската компанија „МекКинзи“ проценува дека пазарот на роботика за општа намена (англиски: general-purpose robotics market) би можел да достигне 370 милијарди долари до 2040 година. Во моментов вреди помалку од милијарда долари.

Можноста е отворена за производителите на роботи, како и за компаниите што ги снабдуваат со сензори, дискови, чипови и софтвер.

Значи, јасно е дека инвестирањето во роботика одамна не е футуристичка идеја – на берзите на големо се тргува со акциите на компаниите што им овозможуваат на роботите да „гледаат“ и да се движат прецизно. Инвеститорите исто така можат да изберат производители на индустриски роботи или, преку ЕТФ (фонд кој се тргува на берза), да покријат неколку компании од секторот со една инвестиција.

Волстрит очекува рекордна година со профит над 90 милијарди долари

Силната година за њујоршките компании за тргување и инвестициско банкарство е на пат да донесе рекордни приходи за индустријата, при што се очекува профитот да надмине 90 милијарди долари, а бонусите да достигнат историски највисоко ниво.

Проценката за годишната добивка, заснована на растот во првата половина од 2026 година, значително би го надминала минатогодишниот рекорд од 65,1 милијарди долари, според извештајот на контролорот на државата Њујорк, Томас ди Наполи. Неговата канцеларија го мерела профитот на брокерско-дилерските операции на фирмите членки на Њујоршката берза.

Тој огромен приход би требало да се претвори во рекордни бонуси во новата година за финансиските професионалци низ целиот сектор, доколку нема значително економско нарушување, рече ди Наполи.