Ако има потреба, МЕПСО утре ќе исклучува фотоволтаици

Министерката за енергетика Сања Божиновска им дала насоки на МЕПСО и Регулаторната комисија за енергетика (РКЕ) утре повторно да бидат активирани мерките што важеа за велигденските празници. Тоа значи дека ако се појави потреба, некои од фотоволтаичните централи ќе бидат исклучени.

Одлуката е донесена на вонреден состанок на министерката Божиновска со претседателот на РКЕ, Марко Бислимоски, и со заменик-генералниот директор на МЕПСО, Александар Пауновски.

Марко Бислимоски, претседател на РКЕ, Сања Божиновска, министерка за енергетика, и Александар Пауновски, заменик-генерален директор на МЕПСО

„Овие два дена во Атина, каде што се одржува Балканскиот енергетски самит, разговаравме со колегите од регионот и се координиравме околу мерките што сите земји мора да ги преземат за стабилен систем. Како што веќе информиравме, со координација меѓу сите клучни енергетски чинители и по насока на ENTSO-E, МЕПСО веќе примени дел од тие мерки за велигденските празници и успеавме да го неутрализираме ризикот од блекаут – граѓаните имаа непречено снабдување со електрична енергија. Процените се дека ваквата состојба ќе продолжи и за претстојните првомајски празници и затоа е неопходно овие мерки повторно да се активираат“, изјави министерката Божиновска.

Исклучувањето на дел од соларните централи за првпат беше применето за велигденските празници. Во текот на пладневните часови, кога производството на струја од сонце е најголемо, вишокот струја немало каде да се продаде, постоела опасност од колапс на системот. Поради тоа МЕПСО побарало дозвола од РКЕ за исклучување дел од централите.

Целта на исклучувањето е растоварување на електроенергетската мрежа за да се овозможи сигурно управување со системот во услови на зголемени флуктуации и оптоварување, соопшти Министерството за енергетика.

Претседателот на РКЕ, Марко Бислимоски, вчера изјави дека од МЕПСО побарале овие мерки да важат во текот на летниот период, до крајот на октомври. 

„Мерките предвидуваат примена на корективни диспечерски интервенции, односно привремено и наизменично исклучување дел од фотоволтаичните електроцентрали поврзани на преносната и дистрибутивната мрежа, со што МЕПСО ќе има целосна можност да го раководи системот и да ја обезбеди неговата стабилност“, се наведува во соопштението на Министерството за енергетика.